2022 წლის ივნისის საინვესტიციო სამსახურის ანგარიშის მიხედვით, საპენსიო ფონდის წმინდა ამონაგები 2019 წლიდან 2022 წლის ივნისის ჩათვლით 35.61%-ია, ხოლო რეალურმა ამონაგებმა (ინფლაციის გათვალისწინებით) იმავე პერიოდში 0,77% შეადგინა. ამის შესახებ ინფორმაციას საპენსიო სააგენტო ავრცელებს.

მათივე ინფორმაციით, საპენსიო ფონდმა მარტის თვიდან დაიწყო დოლარის შესყიდვა და 30 ივნისის მდგომარეობით საინვესტიციო პორტფელის 19% განთავსებულია დოლარში, ხოლო 81% ლარში.

„საპენსიო ფონდის ინვესტირების პროცესის დეტალური სურათი ასე გამოიყურება: 16.1% მიმდინარე ანგარიშებზე, 3.4% ადგილობრივ სახაზინო ობლიგაციებში, 4.9% ამერიკის სახაზინო ობლიგაციებში, 9.5% გლობალურ აქციებში, 0.1% უცხოურ კორპორაციულ ობლიგაციებში, ხოლო სადეპოზიტო სერტიფიკატებსა/ვადიანი ანაბრებში 65.1% განთავსებული.

ამ დროისათვის, საპენსიო აქტივების მოცულობამ 2.437 მლრდ ლარი შეადგინა. აქედან, საინვესტიციო საქმიანობის შედეგად დარიცხული სარგებელი 336 მილიონი ლარია. დაგროვებითი პენსიით კი, ივნისის თვის მდგომარეობით 2053-მა პირმა ისარგებლა, მათზე გაცემულმა თანხამ შეადგინა 4,320,840.66 ლარი“, - ნათქვამია ინფორმაციაში.