მარიამ ქვრივიშვილი - USAID-ის მხარდაჭერით, აქტიურად ვმუშაობთ საქართველოს ცნობადობის გაზრდასა და მეტი ტურისტის მოზიდვაზე აშშ-დან და ევროკავშირის ქვეყნებიდან

საქართველოში მსოფლიოში პოპულარული მოგზაურ ბლოგერთა და ინფლუენსერთა 15-კაციანი ჯგუფი ჩამოვიდა, რომელთა მონაწილეობითაც ეკონომიკისა და მდგრადი განვითარების სამინისტროს ტურიზმის ეროვნული ადმინისტაცია, ამერიკულ პლატფორმა Steller-თან ერთად და აშშ - ის საერთაშორისო განვითარების სააგენტოს ეკონომიკური უსაფრთხოების პროგრამის მხარდაჭერით, მორიგ მასშტაბურ პროექტს იწყებს.

ეკონომიკისა და მდგრადი განვითარების ინფორმაციით, 2 კვირის განმავლობაში Facebook-ის, Instagram-ის TikTok - ის და სხვა სოციალური ქსელების წამყვანი ბლოგერები და ინფლუენსერები აშშ-დან, კანადიდან და ევროპიდან საქართველოს ტურისტულ ადგილებს მოინახულებენ, გადაიღებენ და მათ შესახებ სოციალურ ქსელებში ინფორმაციას გაავრცელებენ.

უწყების ცნობით, პროექტის მესამე ეტაპის ოფიციალურ გახსნაში მონაწილეობა მიიღეს ეკონომიკისა და მდგრადი განვითარების მინისტრის მოადგილე მარიამ ქვრივიშვილმა და აშშ - ის ელჩმა საქართველოში კელი დეგნანმა.

თავის მისალმებაში, მინისტრის მოადგილემ მადლობა გადაუხადა აშშ - ის საერთაშორისო სააგენტოს ეკონომიკური უსაფრთხოების პროგრამის ხელმძღვანელობას პროექტის სამივე ეტაპის მხარდაჭერისთვის.

„ჩვენ გასული ორი ეტაპის მანძილზე, ერთიანი ძალისხმევით, შევძელით, საქართველოს ტურისტული ცნობადობა 150-მილიონიანი აუდიტორიისთვის გაგვეცნო. დარწმუნებული ვართ, რომ ასეთი მნიშვნელოვანი პროექტები ხელს უწყობს ჩვენი ქვეყნის ცნობადობის გაზრდას და უფრო მეტი ტურისტის მოზიდვას აშშ-დან, ევროკავშირის ქვეყნებიდან საქართველოში“, - განაცხადა მარიამ ქვრივიშვილმა.

მისი თქმით, ასეთი აქტივობები მნიშვნელოვანია საქართველოსთვის, განსაკუთრებით ასეთ რთულ დროს, პანდემიის შემდეგ.

„ჩვენ გვაქვს დადებითი მოლოდინები, რომ ამ პროექტით უფრო მეტ ადამიანს გავუჩენთ სურვილს, რომ წელს საქართველოში იმოგზაუროს“, - აღნიშნა მარიამ ქვრივიშვილმა.

უწყების ინფორმაციით, ბლოგერებსა და ინფლუენსერებს ასევე მიესალმა აშშ - ის ელჩი საქართველოში. კელი დეგნანმა იმედი გამოთქვა, რომ პროექტი ხელს შეუწყობს საქართველოში ტურიზმის განვითარებას, მაღალანაზღაურებადი სამუშაო ადგილების შექმნას, განსაკუთრებით კოვიდ პანდემიის შემდეგ.

„ბლოგერები და ინფლუენსერები საქართველოს სხვადასხვა რეგიონის სათავგადასავლო, ეკო, კულტურულ-ტურისტულ მიმართულებებსა და პროდუქტებს სოციალურ ქსელებში პოპულარიზაციას გაუწევენ, რომელსაც მილიონობით ინტერნეტ მომხმარებელი გაეცნობა მთელ მსოფლიოში. პროექტის ფარგლებში სოციალურ ქსელებში ასობით ისტორია მომზადდება საქართველოს, როგორც ჯერ კიდევ აღმოუჩენელი ტურისტული მიმართულების, მიმზიდველი ადგილებისა და ხალხის შესახებ. შექმნილი მედია პროდუქტები ინფლუენსერების სოციალურ ქსელებთან ერთად, USAID - ის, ტურიზმის ადმინისტრაციისა და Steller-ის სოციალურ ქსელებსა და ვებგვერდებზე აიტვირთება. Steller ინოვაციური პლატფორმაა, რომელიც მომხმარებლებს მოგზაურობასთან დაკავშირებული გამოცდილების გაზიარების ახლებურ გზას სთავაზობს“,- ნათქვამია ინფორმაციაში.

ზურაბ ბატიაშვილი - საქართველოს მთავარი პრობლემა იმაშია, რომ საბჭოთა კავშირი იურიდიულად 31 წლის წინ კი დაიშალა, მაგრამ მენტალური საბჭოთა კავშირი ისევ აქაა და არსად წასულა
ქართული პრესის მიმოხილვა 15.08.2022
ეკატერინე ციმაკურიძე - სასამართლოსა და პროკურატურის რეფორმისთვის რეალური ნაბიჯების გადაუდგმელად ევროინტეგრაცია ვერ მოხდება, თუნდაც სხვა ყველა საკითხი შესრულდეს