ირაკლი კობახიძე - ივანიშვილს არ სჭირდება არავის, მათ შორის არც ჩვენი დაცვა, იქით შეიძლება დაიცვას ბევრი - მნიშვნელოვანია ევროკომისია გაემიჯნოს უპასუხისმგებლო დოკუმენტს, სადაც ითხოვენ სააკაშვილი-გვარამიას გათავისუფლებას და ივანიშვილის დასჯას

ბიძინა ივანიშვილს არ სჭირდება არავის და მათ შორის არც ჩვენი დაცვა - წერილის შინაარსი შეთანხმებული გვქონდა, შესაბამისად, პასუხისმგებლობას ვიღებთ, - ამის შესახებ „ქართული ოცნების“ თავმჯდომარე ირაკლი კობახიძემ ჟურნალისტებს განუცხადა, რითაც პრემიერ-მინისტრის მიერ ევროკომისიის პრეზიდენტისთვის გაგზავნილ წერილს გამოეხმაურა.

როგორც კობახიძე აღნიშნავს, მთავარი საზრუნავი არა კონკრეტულ პირის გაფრთხილება, არამედ ისაა, რომ ოლიგარქიული მმართველობის დაბრალება სახელმწიფოსთვის ზიანის მიყენებაა.

ბიძინა ივანიშვილს არ სჭირდება არავის და მათ შორის არც ჩვენი დაცვა. იქით შეიძლება დაიცვას ძალიან ბევრი. მთავარი საზრუნავი არის არა ის, რომ კონკრეტულ პირს გავუფრთხილდეთ, (თუმცა ესეც შეიძლება იყოს ჩვენი საზრუნავი, რადგან ეს კაცი ჩვენი დამფუძნებელია) არამედ ის, რომ როდესაც ოლიგარქიულ მმართველობას გაბრალებენ, ეს არის ზიანის მიყენება ჩვენი სახელმწიფოსთვის.

ამ წერილის შინაარსი შეთანხმებული გვქონდა. პრემიერმა მე და გუნდი ჩაგვაყენა საქმის კურსში, ამასთან დაკავშირებით კონსულტაციები გვქონდა, შესაბამისად პასუხისმგებლობას ვიღებთ“,- განაცხადა ირაკლი კობახიძემ.

ამასთან, კობახიძემ პრემიერის წერილის მიზანს განმარტავს და ამბობს, რომ მმართველ გუნდს სურს, ევროკომისიის დოკუმენტი რადიკალური ოპოზიციის მხრიდან პოლარიზაციისთვის არ იყოს გამოყენებული.

„წერილის მიზანი არის რა - არსებობს ევროპარლამენტის რეზოლუცია, რომელსაც რადიკალური ოპოზიცია საქართველოში პოლარიზაციის გაღრმავებისთვის იყენებს. ასევე არის ევროკომისიის შეფასების დოკუმენტში დეოლიგარქიზაციის შესახებ ჩანაწერი, რასაც რადიკალური ოპოზიცია და მისი ლობისტები პოლარიზაციისთვის იყენებენ. ჩვენ გვინდა, რომ ევროკომისიის დოკუმენტი არ იყოს გამოყენებული რადიკალური ოპოზიციის მხრიდან პოლარიზაციისთვის. ზუსტად ამას ემსახურებოდა პრემიერის წერილი ურსულა ფონ დერ ლაიენის მიმართ. ეს არის ამ წერილის არსი და მიზანი. რაც შეეხება 12 პუნქტს - ყველამ კარგად იცის, რომ წარმოვადგინეთ ამ გეგმის შესრულების კონკრეტული გრაფიკი პასუხისმგებელი სუბიექტებით, ვადებით, ასე რომ ამ თემასთან დაკავშირებით კითხვა არ არსებობს“,- განაცხადა კობახიძემ.

კითხვაზე იმის შესახებ, რომ მმართველი გუნდის ყოფილი წევრების თქმით, წერილის სტილი ბიძინა ივანიშვილის სტილს ჰგავს, კობახიძე ამბობს: „რომელი სტილის სპეციალისტები ეგენი მყვანან?!“

„ერთ მარტივ რამეზეა საუბარი - მნიშვნელოვანია ევროკომისია გაემიჯნოს იმ უპასუხისმგებლო დოკუმენტს, რასაც ჰქვია ევროპარლამენტის რეზოლუცია, სადაც ითხოვენ სააკაშვილის და გვარამიას გათავისუფლებას და ივანიშვილის დასჯას. ამისგან გამიჯვნა იქნებოდა პროდუქტიული პოლარიზაციის შემცირებისთვის“,- განაცხადა კობახიძემ.

თენგიზ ფხალაძე - რუსეთის ყველა უკანონო ნაბიჯი მოითხოვს რეაგირებას, მოსკოვმა უნდა გადაიხადოს პოლიტიკური ფასი საქართველოს წინააღმდეგ ჩადენილი ყველა დანაშაულისათვის, დუმილით კი ამას ვერ მივაღწევთ
ქართული პრესის მიმოხილვა 08.08.2022
საქართველოში „ვებსტერის უნივერსიტეტის“ უცხოელი პროფესორების ვინაობა ცნობილია
BTU მსოფლიოს წამყვან კიბერუსაფრთხოების ორგანიზაციასთან თანამშრომლობას იწყებს
Fitch-მა "ლიბერთის" საკრედიტო რეიტინგის მოლოდინი "სტაბილურად" შეაფასა
„მოასწარი ზაფხული“ - ლიბერთის ახალი აქცია სამომხმარებლო სესხებზე დაიწყო