ევროკავშირის წევრი სახელმწიფოები რუსეთის წინააღმდეგ მორიგ, გაძლიერებულ სანქციებს დათანხმდნენ. აღნიშნულ ინფორმაციას ევროკომისიის პრეზიდენტი ურსულა ფონ დერ ლაიენი "ტვიტერის" გვერდზე ავრცელებს.

ლაიენის თქმით, აღნიშნული სანქციებით მოსკოვის მიმართ ზეწოლა გაგრძელდება მანამ, სანამ ეს საჭირო იქნება.

"წევრი სახელმწიფოები კრემლის წინააღმდეგ ევროკავშირის გაძლიერებულ და გახანგრძლივებულ სანქციებს დათანხმდნენ, ამას მივესალმები. ეს მოსკოვს ძლიერ სიგნალს უგზავნის: ჩვენ შევინარჩუნებთ ზეწოლას იმდენ ხანს, რამდენიც საჭირო იქნება", - წერს ლაიენი.

ცნობისთვის, ევროკომისიამ გასულ კვირას ახალი წინადადებები წარმოადგინა, რომელიც სანქციების ეფექტურობის გაზრდას ითვალისწინებს. ეს გულისხმობს სანქციების 6 თვით გახანგრძლივებას.