სოფლის მეურნეობის სახელმწიფო ლაბორატორიის წარმომადგენლები საფრანგეთში სამუშაო ვიზიტით იმყოფებოდნენ
სოფლის მეურნეობის სახელმწიფო ლაბორატორიის თანამშრომლები, საფრანგეთის სურსათის, გარემოს და შრომის უსაფრთხოების სააგენტოს (ANSES) ცხოველთა დაავადებების ლაბორატორიაში სამუშაო ვიზიტით იმყოფებოდნენ.
გარემოს დაცვისა და სოფლის მეურნეობის სამინისტროს ინფორმაციით, ვიზიტი სამეცნიერო პროექტის „აზერბაიჯანსა და თურქეთში ბრუცელოზის ბიოზედამხედველობა“ ფარგლებში განხორციელდა.
უწყების ცნობით, პროექტის მონაწილე მხარეებმა ბრუცელოზის დიაგნოსტიკის ახალი მეთოდები და მაღალი მგრძნობელობის სადიაგნოსტიკო საშუალებები განიხილეს.
„აღსანიშნავია, რომ საქართველოში ბრუცელოზის წინააღმდეგ საკონტროლო ღონისძიებები აქტიურად ტარდება. პროექტის ფარგლებში ოპერაციული პროცედურების სტანდარტიზაცია მიმდინარეობს, რათა, ერთიანი სისტემით მუშაობა და რეგიონში არსებული შედეგების შეჯამება მოხდეს.
სოფლის მეურნეობის სახელმწიფო ლაბორატორია საერთაშორისო ორგანიზაციებთან აქტიურად თანამშრომლობს. თანამშრომლობის ფარგლებში, არაერთი მნიშვნელოვანი პროექტი განხორციელდა და მიმდინარეობს“, - აღნიშნულია სამინისტროს მიერ გავრცელებულ ინფორმაციაში.
