პერსონალურ მონაცემთა დაცვის სამსახურის უფროსმა - ლელა ჯანაშვილმა და სამსახურის უფროსის პირველმა მოადგილემ - ოთარ ჩახუნაშვილმა რეგიონული შეხვედრების ციკლის პირველი ნაწილი იმერეთში დაასრულეს. ამის შესახებ ინფორმაციას პერსონალურ მონაცემთა დაცვის სამსახური ავრცელებს.

მათი ცნობით, ლელა ჯანაშვილი და ოთარ ჩახუნაშვილი იმერეთის სახელმწიფო რწმუნებულს - ზვიად შალამბერიძეს შეხვდნენ, სადაც მას სამსახურის ძირითადი ფუნქციები და საქმიანობა გააცნეს. ხაზი გაესვა მუნიციპალიტეტებთან კოორდინირებული მუშაობის მნიშვნელობას.

„სხვა რეგიონების მსგავსად, საჯარო სექტორის წარმომადგენლებთან შეხვედრა ქალაქ ქუთაისში, გაფართოებულ ფორმატში გაიმართა. შეხვედრას 12- ვე მუნიციპალიტეტის 20-ზე მეტი წარმომადგენელი ესწრებოდა.

პერსონალურ მონაცემთა დაცვის სამსახურის უფროსი, ასევე სამსახურის სხვა თანამშრომლები საჯარო სექტორის წარმომადგენლებს პერსონალური მონაცემების დაცვის მნიშვნელობის შესახებ ესაუბრნენ. გააცნეს სამსახურის საქმიანობა და საზოგადოების ცნობიერების ამაღლების მნიშვნელობა, ასევე საჯარო სექტორის თანამშრომლების როლი პერსონალური მონაცემების დამუშავების პროცესში.

რეგიონებში საჯარო სექტორის წარმომადგენლებთან შეხვედრას პერსონალურ მონაცემთა დაცვის სამსახური მომავალშიც აქტიურად გააგრძელებს“, - ნათქვამია ინფორმაციაში.