პრემიერი - გავაკეთებ მაქსიმუმს, რომ აშშ-სთან, ევროპასთან ურთიერთობები გავაძლიეროთ - ჩვენ მივდივართ ევროპისკენ, ეს არის შეუქცევადი გზა, სხვა ყოველგვარი სპეკულაცია არის საფუძველს მოკლებული

ერთი მინდა ვთქვა, მე, როგორც მთავრობის მეთაური ვაკეთებ და გავაკეთებ მაქსიმუმს, რომ ეს ურთიერთობები, რომელიც გვაქვს ამერიკასთან, ევროპასთან კიდევ უფრო გავაძლიეროთ, განვამტკიცოთ. რა თქმა უნდა, ეს ჩვენი ქვეყნის ინტერესებშია, - ამის შესახებ საქართველოს პრემიერ-მინისტრმა ირაკლი ღარიბაშვილმა ჟურნალისტებს განუცხადა, რითაც უპასუხა კითხვას, რატომ უპირისპირდება ხელისუფლება საქართველოში აშშ-ს ელჩს, კელი დეგნანს.

როგორც პრემიერმა აღნიშნა, ყველაფერი უნდა გაკეთდეს იმისთვის, რომ მაქსიმალურად გაძლიერდეს ურთიერთობები მთავარ სტრატეგიულ პარტნიორ ამერიკასთან. ამავდროულად, ღარიბაშვილმა აღნიშნა, რომ მთავრობამ ქვეყანას დიდი განსაცდელი, ომი აარიდა თავიდან.

„მინდა, კიდევ ერთხელ მივმართო ჩვენს საზოგადოებას - ჩვენ, რომ იტყვიან, ძალიან დიდი განსაცდელი გამოვიარეთ მას შემდეგ, რაც უკრაინაში ომი დაიწყო. ჩვენმა გუნდმა, მთლიანად ჩვენ, ყველამ ერთად მოვახერხეთ ის, რომ ეს განსაცდელი ჩვენს ქვეყანას ავარიდეთ. მიუხედავად ძალიან ბევრი მცდელობისა, პროვოკაციისა და პირდაპირი მოწოდებებისა, ჩვენმა გუნდმა თავიდან აიცილა ყველაზე დიდი განსაცდელი, რაც შეიძლება ჩვენს ხალხს და ქვეყანას დამართნოდა, ეს არის ომი. მადლობა ღმერთს, რომ ჩვენ შევინარჩუნეთ ჩვენი ეროვნული პოლიტიკით მშვიდობა, სტაბილურობა და ორნიშნა ეკონომიკური ზრდა არ არის შემთხვევით. ასე რომ, ახლა რა თქმა უნდა, ჩვენ უნდა გავაგრძელოთ მშვიდად, დინჯად, მტკიცედ ჩვენი ქვეყნის მართვა და წინსვლა. რა თქმა უნდა, ამავდროულად მინდა ვთქვა, ჩვენ ყველაფერი უნდა გავაკეთოთ იმისათვის, რომ მაქსიმალურად გავაძლიეროთ ჩვენი ურთიერთობები ჩვენს მთავარ სტრატეგიულ პარტნიორთან, ამერიკასთან.

ძალიან ბევრი კითხვა დაისვა საზოგადოების მხრიდან, ძალიან ბევრი პოლიტიკოსი ძალიან აქტიურად არის ჩართული ამ კითხვების დასმაში, ძალიან ბევრი ინფორმაცია ვრცელდება. ერთი მინდა ვთქვა, რომ მე, როგორც მთავრობის მეთაური ვაკეთებ და გავაკეთებ მაქსიმუმს, რომ ეს ურთიერთობები, რომელიც გვაქვს ამერიკასთან, ევროპასთან კიდევ უფრო გავაძლიეროთ, განვამტკიცოთ. რა თქმა უნდა, ეს ჩვენი ქვეყნის ინტერესებშია. ეს არის ჩვენი მთავარი ამოცანა. ჩვენ მივდივართ ევროპისკენ, ეს არის შეუქცევადი გზა. სხვა ყველაფერი, ყოველგვარი სპეკულაციები არის საფუძველს მოკლებული“, - განაცხადა ღარიბაშვილმა.

ზურაბ ბატიაშვილი - საქართველოს მთავარი პრობლემა იმაშია, რომ საბჭოთა კავშირი იურიდიულად 31 წლის წინ კი დაიშალა, მაგრამ მენტალური საბჭოთა კავშირი ისევ აქაა და არსად წასულა
ქართული პრესის მიმოხილვა 15.08.2022
ეკატერინე ციმაკურიძე - სასამართლოსა და პროკურატურის რეფორმისთვის რეალური ნაბიჯების გადაუდგმელად ევროინტეგრაცია ვერ მოხდება, თუნდაც სხვა ყველა საკითხი შესრულდეს
უკრაინულმა კრიპტოვალუტის ბირჟამ WhiteBIT საკუთარი ტოკენის გაშვების შესახებ გამოაცხადა
ბაზისბანკის ფინანსური ჩართულობით, ახალგაზრდობის საერთაშორისო დღისადმი მიძღვნილი კონკურსის ფინალური შეხვედრა გაიმართა