ბიზნესისა და ტექნოლოგიების უნივერსიტეტი გლობალური ინიციატივისა და პლატფორმის, Moving Worlds-ის პარტნიორი გახდა. Moving Worlds აერთიანებს ორგანიზაციებს მსოფლიოს სხვადასხვა ქვეყნიდან და ახორციელებს საერთაშორისო აქტივობებს მდგრადი ეკონომიკისა და სოციალური მეწარმეობის გაძლიერების მიმართულებით.

Moving Worlds-ის პარტნიორობის ფარგლებში, ბიზნესისა და ტექნოლოგიების უნივერსიტეტს მიეცემა წვდომა ინოვაციურ სასწავლო მეთოდებზე, გადამზადების პროგრამებზე, მსოფლიო მასშტაბით აღიარებულ პრო ბონო კონსულტანტებსა და მენტორებზე. ასევე, BTU განახორციელებს პროექტებსა და სამეცნიერო კვლევებს, რომლებიც მიმართული იქნება მდგრადი გლობალური ეკონომიკის განვითარებისკენ. თანამშრომლობის ფარგლებში, ბიზნესისა და ტექნოლოგიების უნივერსიტეტი პარტნიორ ორგანიზაციებს და ბენეფიციარებს დაეხმარება განავითარონ სოციალური მეწარმეობა, მოიზიდონ ფინანსური ინვესტიციები და იზრუნონ გლობალურ კეთილდღეობაზე.

BTU Moving Worlds-ის პარტნიორი SAP-ისა და Pyxera Global-ის ბენეფიციარობის ფარგლებში გახდა. SAP წარმოადგენს გერმანულ კომპანიას, რომელიც ციფრული ტექნოლოგიების გამოყენებით ავითარებს პროგრამულ უზრუნველყოფას ბიზნეს ოპერაციებისა და კლიენტებთან ურთიერთობის სამართავად. SAP არის მსოფლიოში წამყვანი, საწარმოთა რესურსების დაგეგმვის პროგრამული უზრუნველყოფის ვენდორი.

(R)