„ქართული ოცნების“ ლიდერის, ირაკლი კობახიძის განმარტებით, სახალხო დამცველის პოსტზე კანდიდატის არჩევასთან დაკავშირებით გადაწყვეტილება ოპოზიციასთან ერთად უნდა იქნას მიღებული.

როგორც კობახიძემ ჟურნალისტებს განუცხადა, მთავრობა გადაწყვეტილებას ერთპიროვნულად ვერ მიიღებს.

„ამ თემასთან დაკავშირებით გადაწყვეტილება უნდა მივიღოთ ოპოზიციასთან ერთად. პარლამენტში ამ გადაწყვეტილებას 90 ხმა სჭირდება, აქედან გამომდინარე ჩვენ ერთპიროვნულ გადაწყვეტილებას ვერ მივიღებთ. კონსულტაციები დაგვჭირდება ოპოზიციის წარმომადგენლებთან , ამის შემდეგ ვისაუბრებთ კონკრეტულ კანდიდატებზე. დღეს ვერცერთ სახელსა და გვარზე ვერ ვისაუბრებთ“,- განაცხადა კობახიძემ.

ცნობისთვის, სახალხო დამცველის არჩევას კვალიფიციური უმრავლესობა - 90 ხმა სჭირდება. მოქმედ სახალხო დამცველს უფლებამოსილების ვადა მიმდინარე წლის დეკემბერში გასდის.

შეგახსენებთ, რომ "რუსთავი 2"-ის ინფორმაციით, სახალხო დამცველის პოსტზე განიხილება თამარ ჩუგოშვილის და ზაზა ხუციშვილის კანდიდატურები. მედიაში ასევე ვრცელდება ინფორმაცია ნიკოლოზ თათულაშვილის კანდიდატურის შესახებაც.