მშობლების მკვლელობაში ბრალდებულმა გიორგი ბეროზაშვილმა პოზიცია შეიცვალა და დანაშაულს აღარ აღიარებს

მშობლების მკვლელობაში ბრალდებულმა გიორგი ბეროზაშვილმა პოზიცია შეიცვალა და ამჯერად ის დანაშაულს აღარ აღიარებს. მიუხედავად იმისა, რომ ბეროზაშვილმა გასულ სხდომაზე მშობლების მკვლელობა აღიარა და ბრალს სრულად დაეთანხმა, მან დღევანდელ სასამართლო პროცესზე განაცხადა, რომ ის დუმილის უფლებას იყენებს.

სასამართლო სხდომაზე დაცვის მხარემ სხდომის დახურვის შუამდგომლობა დააყენა. ადვოკატმა მოსამართლეს დაზარალებულის უფლებამონაცვლის - ბრალდებულის დის, თამარ ბეროზაშვილის განცხადებაც წარუდგინა, რომელშიც ბეროზაშვილი მისი ოჯახის წევრების ინტერესების გათვალისწინებით სხდომის დახურვას ითხოვდა, რადგან ეს მათ პირად ცხოვრებას ეხებოდა. აღნიშნულ შუამდგომლობას არ დაეთანხმა ბრალდების მხარე.

როგორც პროკურორმა გრიგოლ ბიბილეიშვილმა განმარტა, დაცვის მხარის შუამდგომლობა დაუსაბუთებელი იყო, რის გამოც, ის არ უნდა დაკმაყოფილებულიყო.

მოსამართლე გიზო უბილავამ დაცვის მხარის შუამდგომლობა არ დააკმაყოფილა და აღნიშნა, რომ ეს გადაწყვეტილება შუამდგომლობის უსაფუძვლობის გამო არ დაკმაყოფილდა.

ცნობისთვის, ვაზისუბანში, ერთ-ერთ საცხოვრებელ კორპუსში მიმდინარე წლის 27 აპრილს ხანძარი მოხდა, რომელსაც წინ მკვლელობა უძღვოდა. 30 წლის გიორგი ბეროზაშვილმა მძინარე მშობლები ჯერ მოკლა, შემდეგ კი კვალის დაფარვის მიზნით, სახლს ცეცხლი წაუკიდა. ზაზა ბეროზაშვილისა და ლალი თავაძის ცხედრებს, რომლებიც ხანძრის შემდეგ იპოვეს, ცეცხლსასროლი იარაღით მიყენებული ჭრილობები აღენიშნებოდათ. გამოძიების ინფორმაციით, ბრალდებულმა ყაჩაღობის ინსცენირება მოახდინა, შემდეგ კი კვალის დაფარვის მიზნით, სახლს ცეცხლი წაუკიდა და მიიმალა. გიორგი ბეროზაშვილს ბრალდება საქართველოს სისხლის სამართლის კოდექსის 236-ე მუხლის მე-3 და მე-4 ნაწილებით, და 109-ე მუხლის მე-2 ნაწილის „ბ“ და „ვ“ ქვეპუნქტებით და მე-3 ნაწილის „ა“ ქვეპუნქტით წარედგინა, რაც ცეცხლსასროლი იარაღისა და საბრძოლო მასალის უკანონოდ შეძენა- შენახვა-ტარებასა და განზრახ მკვლელობას უმწეო მდგომარეობაში მყოფი ოჯახის ორი წევრის მიმართ გულისხმობს. აღნიშნული ბრალი სასჯელის სახედ და ზომად 16 წლიდან 20 წლამდე ან უვადო თავისუფლების აღკვეთას ითვალისწინებს.

ბავშვთა მიმართ სექსუალური ხასიათის დანაშაულები და მასთან დაკავშირებული პრობლემები - როგორ ამოვიცნოთ მოძალადე და როგორ უნდა დაეხმაროს მშობელი შვილს მომხდარის გადატანაში? - ფსიქოლოგის რეკომენდაციები
ვახტანგ ხმალაძე - როცა ცესკოს მიმართ ნდობა დაბალია, არჩევნების ჩატარება სახიფათო რისკების შემცველია
ქართული პრესის მიმოხილვა 22.02.2024
ჰიუნდაი ავტო საქართველოში შერჩეულ მოდელებზე მწარმოებლის ბონუსს მიიღებთ
ტერაბანკის პარტნიორობით, ილიას სახელმწიფო უნივერსიტეტში პრე-აქსელერაციის პროგრამა დასრულდა
ამერიკის შეერთებული შტატების ელჩი საქართველოს უნივერსიტეტს ესტუმრა
მსოფლიოს წამყვანი ტექნოლოგიური კომპანიის, Salesforce-ის ოფიციალური წარმომადგენელი და პარტნიორი კომპანია INSPARK, საქართველოში იწყებს ოპერირებას
ალექსანდრე ჯეჯელავა საუბრობს 8 ცხოვრებისეულ მოლოდინზე, რომელიც ხშირად განგრევთ
სილქნეტის მაღაზიებში „National Geographic საქართველოს“ სპეციალურ ფასად შეიძენთ