"ლელოს" ლიდერმა, მამუკა ხაზარაძემ და EECMD ხელმძღვანელმა, ლევან ცუცქირიძემ "ვაგენინგენის" მოწვეულ ექსპერტებთან, თბილისში, პირველი სამუშაო შეხვედრა გამართეს. ინფორმაციას ამის შესახებ პარტია „ლელო საქართველოსთვის“ ავრცელებს.

მათივე ცნობით, მსოფლიოს საუკეთესო უნივერსიტეტის “ვაგენინგენის” პროფესორები, სოფლის მეურნეობის მიმართულებით, წალენჯიხაში სამუშაოებს იწყებენ.

დღეს, დარგის პროფესორ-ექსპერტებთან პირველი შეხვედრა გაიმართა და კონკრეტული ღონისძიებები დაიგეგმა.

"ჰოლანდიელი ექსპერტების გამოცდილების გაზიარებით, წალენჯიხაში სოფლის მეურნეობის სექტორის განვითარების, თანამედროვე სტანდარტების დანერგვის და ადგილობრივი მწარმოებლების ევროპულ ბაზარზე გასვლის ხელშეწყობის პროექტი განხორციელდება. ეს იქნება დიდი ბიძგი, როგორც წალენჯიხისთვის ასევე მთელი რაიონისთვის. სოფლის მეურნეობას უდიდესი პოტენციალი აქვს და ჩვენ ყველაფერს გავაკეთებთ, რომ წალენჯიხელებმა ეს დარგი თანამედროვე ხედვებით და მიდგომებით განავითარონ", - განაცხადა მამუკა ხაზარაძემ.

პარტიის ინფორმაციით, “ვაგენინგენის უნივერსიტეტი” ნიდერლანდების სოფლის მეურნეობის სექტორის წარმატების მთავარი სტიმულატორია. ნიდერლანდები აშშ-ს შემდეგ, მსოფლიოში მეორე უმსხვილესი სოფლის მეურნეობის ექსპორტიორია, დაახლოებით, 100 მილიარდი ევროს პროდუქტების ექსპორტით.