მიხეილ სააკაშვილის ადვოკატის, შალვა ხაჭაპურიძის ინფორმაციით, სააკაშვილი ხვალ, საზღვრის უკანონო კვეთის საქმესთან დაკავშირებულ პროცესს ჯანმრთელობის მდგომარეობის გამო ვერ დაესწრება.

როგორც ხაჭაპურიძემ „ინტერპრესნიუსთან“ საუბრისას აღნიშნა, სააკაშვილის ადვოკატები სასჯელის გადავადებასთან დაკავშირებით შუამდგომლობას მას შემდეგ დააყენებენ, როდესაც ამერიკელი ექსპერტების დასკვნა გამოქვეყნდება.

„მიხეილ სააკაშვილი ვერ მოახერხებს პროცესზე გამოცხადებას ავადმყოფობის გამო, გამომდინარე აქედან დავაყენებთ შუამდგომლობას პროცესის გადადებაზე.

ხვალინდელ პროცესზე სასჯელის გადავადებასთან დაკავშირებით, შუამდგომლობის დაყენებას არ ვაპირებთ, ველოდებით ექსპერტიზის დასკვნას. ველოდებით როდის გასცემს ჯანდაცვის სამინისტრო ნებართვას ამერიკელი ექსპერტების ჩამოსვლასთან დაკავშირებით, ამ ყველაფერს ალბათ 1 კვირა დასჭირდება, რის შემდეგაც მივმართავთ სასამართლოს სასჯელის გადავადებაზე, გამომდინარე იქიდან, როგორი იქნება ექსპერტიზის დასკვნა. თუ დაწერენ, რომ სააკაშვილი მძიმე ავადმყოფია, მივმართავთ სასამართლოს. სააკაშვილის ჯანმრთელობის მდგომარეობა არის სტაბილურად მძიმე, დაავადებები ემატება და ემატება“, - აღნიშნა შალვა ხაჭაპურიძემ.

შეგახსენებთ, რომ მიხეილ სააკაშვილის მიერ საზღვრის უკანონო კვეთის ფაქტთან დაკავშირებით გამოძიება პირველ ოქტომბერს დაიწყო. აღნიშნული საქმის ფარგლებში ბრალდება კიდევ 4 პირს - ელგუჯა ცომაიას, ზურაბ და შალვა წოწორიებსა და გიორგი ნარიმანიძეს აქვთ წაყენებული და ის ცალკე წარმოებად მიმდინარეობს. აღნიშნული პირები ბრალს აღიარებენ.