სემეკთან არსებული ელიზბარ ერისთავის სახელობის ენერგეტიკის სასწავლო ცენტრი დაინტერესებული პირებისთვის 19 სექტემბრიდან ახალ სასწავლო კურსს იწყებს. ინფორმაციას ამის შესახებ საქართველოს ენერგეტიკისა და წყალმომარაგების მარეგულირებელი ეროვნული კომისია ავრცელებს.

უწყების განცხადებით, სასწავლო კურსის თემატიკა შეეხება ელექტროენერგეტიკული სექტორის რეგულირებას.

კურსის ფარგლებში მონაწილეებს ჩაუტარდებათ ტრენინგები შემდეგ თემებზე: ენერგეტიკის სექტორის სამართლებრივი საფუძვლები და საკანონმდებლო ჩარჩო; ელექტროენერგეტიკული სექტორის ძირითადი პარამეტრები, ტიპოლოგია და სუბიექტები; ენერგეტიკული ბაზრების ლიბერალიზაციის პროცესი საქართველოსა და სხვადასხვა ქვეყნებში; ენერგეტიკული ბირჟის ფუნქციები და ბირჟაზე ვაჭრობის პარამეტრები; სატარიფო რეგულირების პრინციპები და მეთოდოლოგიური საფუძვლები; მომხმარებელთა უფლებები და მომსახურების ხარისხი ელექტროენერგეტიკის სექტორში.

ტრენინგებს ჩაატარებენ სემეკის წარმომადგენლები და მოწვეული სპეციალისტები ენერგეტიკის სექტორში მოქმედი სხვადასხვა უწყებებიდან.

სემეკის ცნობით, კურსის ფარგლებში დაგეგმილია 10 შეხვედრის ორგანიზება და ტრენინგები ჩატარდება კვირაში ორჯერ, სამშაბათს და ხუთშაბათს, 19:00 სთ-ზე, ხოლო თითო ტრენინგის ხანგრძლივობა 2-3 საათს შეადგენს. მონაწილეებს შეეძლებათ ტრენინგებზე როგორც ფიზიკური, ასევე დისტანციური დასწრება. კურსის დასრულების შემდგომ გაიცემა სერტიფიკატი.

კურსის ძირითადი ხარჯები დაიფარება ენერგეტიკის სასწავლო ცენტრის მიერ, აქედან მონაწილეობის მსურველისთვის კურსის სიმბოლური ოდენობა 100 ლარს შეადგენს.

მონაწილეობის მსურველებს რეგისტრაციის გავლა შეუძლიათ მოცემული ბმულის საშუალებით:

https://us06web.zoom.us/meeting/register/tZIod-yoqzkuHtRmf7RsaC47VNUPESawobPD