ხარაგაულში იურიდიული დახმარების სამსახურის საკონსულტაციო ცენტრი გაიხსნა.

იურიდიული დახმარების სამსახურის ცნობით, ღონისძიებაში მონაწილეობა მიიღეს სამსახურის დირექტორმა, რაჟდენ კუპრაშვილმა, ხარაგაულის მუნიციპალიტეტის მერმა, კობა ლურსმანაშვილმა და იურიდიული დახმარების სამსახურის ზესტაფონის ბიუროს უფროსმა გელა ბერაძემ.

ორგანიზაციის ინფორმაციით, რაჟდენ კუპრაშვილმა დამსწრე პირებს კონსულტანტი თეა ჯანგიანი წარუდგინა, რომელიც ხარაგაულის მოსახლეობას ნებისმიერ სამართლებრივ საკითხზე გაუწევს კვალიფიციურ კონსულტაციას.

იურიდიული დახმარების სამსახურის განცხადებაში აღნიშნულია, რომ ოფისის გახსნის შემდეგ მოსახლეობასთან შეხვედრა გაიმართა, რომლის ფარგლებშიც ადგილობრივებს მიეწოდათ ინფორმაცია სამსახურის მიზნებისა და ფუნქციების, უფასო იურიდიული სერვისებით სარგებლობისა და მიმდინარე პროექტების შესახებ.