რუსეთში მაღალი სიზუსტის იარაღის მარაგი უკვე ზღვარზეა და თითქმის არ არის რეზერვები ზოგიერთი ტიპის რაკეტებისთვის - კერძოდ, რთული ვითარებაა „კალიბრთან“, „ისკანდერთან“ და „კინჟალებთან“ დაკავშირებით, - ამის შესახებ უკრაინის თავდაცვის სამინისტროს მთავარი სადაზვერვო სამმართველოს წარმომადგენელმა, ვადიმ სკიბიცკიმ განაცხადა.

„ჩვენი გათვლებით, მათ დარჩათ იმ რაკეტების 45%, რაც ომის დაწყებამდე ჰქონდათ. განსაკუთრებით მძიმე მდგომარეობა აქვთ „ისკანდერებთან“ დაკავშირებით. დაახლოებით იმის 20%-ი, შეიძლება ნაკლებიც დარჩათ, რაც ჰქონდათ. რთული სიტუაციაა "კალიბრებთან" დაკავშირებითაც, ეს საკმაოდ ეფექტური რაკეტაა, მაგრამ მათი რაოდენობა არც ისე დიდია“, - აღნიშნა სკიბიცკიმ.

მისი თქმით, რუსები, სავარაუდოდ, განადგურების სხვა მეთოდებს გამოიყენებენ. კერძოდ, ისინი ახლა აქტიურად იყენებენ „ურაგანსა“ და „სმერჩს“ - ეს არის ის, რაც იძლევა დაბომბვის საშუალებას მცირე, 70-80 კმ, მანძილზე და მაქსიმუმ 100 კილომეტრამდე. რაც შეეხება „კინჟალებს“, ვადიმ სკიბიცკის განცხადებით, რუსეთს ამ ტიპის სარაკეტო კომპლექსის მხოლოდ 30-40 ერთეული აქვს დარჩენილი.