მოსკოვში, რუსეთის შეიარაღებული ძალების გენშტაბის ერთ-ერთი სამმართველოს უფროსის მოადგილის, ევგენი სეკრეტარევის მანქანა დაიწვა. მედიის ინფორმაციით, BMW X6 ლენინგრადის გზატკეცილზე, სეკრეტარევის საცხოვრებელი კორპუსის ეზოში იყო გაჩერებული, რა დროსაც ცეცხლი გაუჩნდა.

გამომძიებლები არ გამორიცხავენ, რომ ჯიპი განზრახ დაწვეს. თვითმხილველების თქმით, მანქანის სიახლოვეს საეჭვო ქალი შენიშნეს, თუმცა ჯერჯერობით უცნობია, დასტურდება თუ არა მომხდართან მისი კავშირი.

ევგენი სეკრეტარევი გენერალური შტაბის მე-8 განყოფილებაში მუშაობს. ის სამხედრო ცენზურაზეა პასუხისმგებელი.