ნევროლოგის, ოთარ თოიძის ინფორმაციით, გაერო-ს ადამიანის უფლებათა უმაღლესი კომისარიატის სასამართლო-სამედიცინო ექსპერტმა ონდერ ოსქალიფჩმა საქართველოს მესამე პრეზიდენტ მიხეილ სააკაშვილს შესაბამისი სამედიცინო შემოწმება ჩაუტარა.

როგორც თოიძემ აღნიშნა, სააკაშვილმა ყველა იმ კითხვას გასცა პასუხი, რომელსაც ექსპერტი ეკითხებოდა, მათ შორის პროცედურულ საკითხებზეც. მისივე თქმით, უცხოელი ექსპერტი დასკვნას სააკაშვილის ჯანმრთელობის მდგომარეობის შესახებ რამდენიმე დღეში გამოაქვეყნებს.

,,მისი დანიშნულებაა შეაფასოს როგორც ისტორიის მონაცემები, ასევე თვითონ პაციენტი. მან გასინჯა პაციენტი და მითხრა, რომ მის შთაბეჭდილებებს გადმომიგზავნიდა. ბატონმა მიხეილმა მისცა ყველა ის ინფორმაცია, რომელსაც ექსპერტი ეკითხებოდა, მათ შორის პროცედურულ საკითხებზე.

სააკაშვილის მდგომარეობა არის გაუარესებადი, თუ დინამიკას გადავხედავთ, პაციენტი მიდის დამძიმებისაკენ, ეს შეიძლება მოხდეს უეცრად ან დროის განმავლობაში”, - აღნიშნა ოთარ თოიძემ.