გარემოს დაცვისა და სოფლის მეურნეობის მინისტრის, ოთარ შამუგიას განცხადებით, საწარმო, რომელიც ფერმერისგან არასტანდარტულ ვაშლს მიიღებს და 1 კგ-ზე არანაკლებ 24 თეთრს გადაუხდის, სახელმწიფოსგან სუბსიდიის სახით, 10 თეთრით მხარდაჭერას მიიღებს.

როგორც მან მთავრობის სხდომის დასრულების შემდეგ გამართულ ბრიფინგზე განაცხადა, აღნიშნული პროცესიის კოორდინაციის მიზნით, შტაბი ფუნქციონირებას ხვალიდან დაიწყებს.

„ჩვენ წელს მოსავლიანობიდან გამომდინარე, დაახლოებით, 40 000-დან 50 000 ტონამდე არასტანდარტული ვაშლის გადამუშავება მოგვიწევს. თითოეული საწარმო, რომელიც ფერმერისგან არასტანდარტულ ვაშლს მიიღებს და 1კგ-ზე გადაანგარიშებით არანაკლებ 24 თეთრს გადაუხდის, სახელმწიფოსგან სუბსიდიის სახით, 10 თეთრით მხარდაჭერას მიიღებს. ეს მნიშვნელოვანია იმისთვის, რომ თითოეულმა ფერმერმა არასტანდარტული ვაშლის სრულად ჩაბარება შეძლოს და შემდგომში მისი გადამუშავება მოხდეს. პროცესში დაახლოებით, 20-მდე საწარმო იქნება ჩართული და ისინი აღნიშნულ პროდუქციას ნედლეულის სახით გამოიყენებენ. იღებენ ვაშლის კონცენტრირებულ წვენს, ხილფაფებს და სხვა პროდუქტებს, რომლის დიდი ნაწილი ექსპორტზე გადის, მათ შორის, ევროკავშირში,“ - განაცხადა ოთარ შამუგიამ.