თეა ახვლედიანი უგზო-უკვლოდ დაკარგულთა საერთაშორისო დღისადმი მიძღვნილ ღონისძიებას დაესწრო

შერიგებისა და სამოქალაქო თანასწორობის საკითხებში სახელმწიფო მინისტრი თეა ახვლედიანი უგზო-უკვლოდ დაკარგულთა საერთაშორისო დღისადმი მიძღვნილ ღონისძიებას დაესწრო.

შერიგებისა და სამოქალაქო თანასწორობის საკითხებში სახელმწიფო მინისტრის აპარატის ინფორმაციით, თეა ახვლედიანმა თბილისში, თამარაშვილის ხეივანში არსებულ უგზო-უკვლოდ დაკარგულ პირთა მემორიალთან შეკრებილ საზოგადოებას სიტყვით მიმართა.

თეა ახვლედიანმა ყურადღება 1990-იანი წლების შეიარაღებული მოქმედებებისა და 2008 წლის აგვისტოს რუსეთ-საქართველოს ომის შედეგად უგზო-უკვლოდ დაკარგულ პირთა მოძიების სახელმწიფო პროგრამის და დაკარგულთა ხსოვნისადმი მიძღვნილი ღონისძიებების განსაკუთრებულ მნიშვნელობაზე გაამახვილა.

სახელმწიფო მინისტრის განცხადებით, უგზო-უკვლოდ დაკარგულთა ბედისა და ადგილსამყოფლის დადგენის პროცესი გრძელდება და უფრო გააქტიურდება, რათა მაქსიმალურად მეტი უგზო-უკვლოდ დაკარგული პირის მოძიება და მათი ოჯახების ხანგრძლივი გაურკვევლობის დასრულება მოხერხდეს.

„დღევანდელი თარიღის აღნიშვნას განსაკუთრებული მნიშვნელობა აქვს პირველ რიგში 2300-ზე მეტი უგზო-უკვლოდ დაკარგულად მიჩნეული პირის ოჯახებისთვის და ზოგადად, საქართველოს საზოგადოების ცნობიერების ამაღლებისთვის იმ შედეგების შესახებ, რაც ოჯახებისთვის საყვარელი ადამიანის გაუჩინარებას და ხანგრძლივ გაურკვევლობას მოაქვს. დღეს, თბილისთან ერთად, უგზო-უკვლოდ დაკარგულთა საერთაშორისო დღეს საქართველოს სხვადასხვა ქალაქში აღვნიშნავთ. პატივს მივაგებთ მათ ხსოვნას, გამოვხატავთ ოჯახებისადმი გულწრფელ თანაგრძნობას და მხარდაჭერას, რომელთათვისაც ძალიან მნიშვნელოვანია იცოდნენ, რომ მათი უგზო-უკვლოდ დაკარგული ოჯახის წევრები დავიწყებულები არ არიან! ჩვენ სამშობლოს წინაშე მათი ღვაწლი მუდამ გვახსოვს და გვემახსოვრება. ჩვენი ამოცანა კი არის დავადგინოთ მათი ხვედრი, ადგილსამყოფელი და ოჯახების ხანგრძლივი მოლოდინი დავასრულოთ, რა მიზანსაც ემსახურება ჩვენი ძალისხმევა სახელმწიფო პროგრამის ფარგლებში, რომელიც წითელი ჯვრის საერთაშორისო კომიტეტის მხარდაჭერით მიმდინარეობს. მინდა დიდი მადლობა გადავუხადო ჩვენს საერთაშორისო პარტნიორებს, სახელმწიფო უწყებების და, რა თქმა უნდა, უგზო-უკვლოდ დაკარგულთა ოჯახების წარმომადგენლებს, დღევანდელ ღონისძიებაში მონაწილეობისთვის,“- განაცხადა სახელმწიფო მინისტრმა, თეა ახვლედიანმა.

შერიგებისა და სამოქალაქო თანასწორობის საკითხებში სახელმწიფო მინისტრის აპარატის ცნობით, ღონისძიებას, რომელიც სახელმწიფო მინისტრის აპარატისა და წითელი ჯვრის საერთაშორისო კომიტეტის ორგანიზებით გაიმართა, დაკარგულთა ოჯახის წევრებთან ერთად, უგზო-უკვლოდ დაკარგულთა ბედისა და ადგილსამყოფლის დადგენის პროცესში ჩართული უწყებების წარმომადგენლები ესწრებოდნენ.

მემორიალი თბილისში უგზო-უკვლოდ დაკარგულ პირთა ოჯახების ინიციატივით, საქართველოს სახელმწიფო მინისტრის აპარატის და წითელი ჯვრის საერთაშორისო კომიტეტის ერთობლივი ძალისხმევით დამზადდა და 2021 წლის 23 სექტემბერს, ქალაქ თბილისის მუნიციპალიტეტის მერიის აქტიური ჩართულობით გაიხსნა.

ლევან ლორთქიფანიძე - აღმასრულებელი და საკანონმდებლო ორგანოების საგარეო პოლიტიკა არ არის აცდენილი ერთმანეთს - დარწმუნებული ვარ, ვენეციის კომისიის რეკომენდაციების უარყოფის გადაწყვეტილება ირაკლი კობახიძის გარეშე არ მიღებულა
ქართული პრესის მიმოხილვა 26.02.2024
ახალ სტრატეგიულ პერიოდში „პაშა ბანკი საქართველო“ მიზნად ისახავს, გახდეს ერთ-ერთი მთავარი არჩევანი ადგილობრივი კორპორატიული მომხმარებლებისთვის