დანებით შეიარაღებულმა თავდამსხმელებმა კანადის ცენტრალურ სასკაჩევანის პროვინციაში სულ მცირე 10 ადამიანი მოკლეს, 15 კი - დაჭრეს, - ინფორმაციას BBC-ი ავრცელებს.

გამოცემის ცნობით, სამართალდამცავებმა ორი ეჭვმიტანილი დაასახელეს : 31 წლის დემიენ სანდერსონი და 30 წლის მაილს სანდერსონი, რომლებიც მიმალულები არიან და შეიარაღებულ და საშიშ პირებად მიიჩნევიან, რის გამოც პროვინციის მოსახლეობას სიფრთხილისკენ მოუწოდებენ.

თავდასხმები სასკაჩევანის პროვინციაში რამდენიმე ადგილას მოხდა. ხელისუფლებაში აცხადებენ, რომ სამძებრო სამუშაოებს დანაშაულის 13 ადგილზე აწარმოებენ, სადაც დაღუპულები და დაშავებულები იპოვეს.

პროვინციაში უსაფრთხოების ზომები გამკაცრებულია, შეიქმნა საკონტროლო-გამშვები პუნქტები, პოლიცია მგზავრების ვინაობას ამოწმებს.

კანადის პრემიერ-მინისტრმა ჯასტინ ტრუდომ თავდასხმას საშინელი და შემზარავი უწოდა.

„ვფიქრობ მათზე, ვინც დაკარგა საყვარელი ადამიანი და მათზე, ვინც დაშავდა“, - დაწერა მან „ტვიტერზე“.