გორში, კომბინატის დასახლების ტერიტორიაზე, ამ წუთებში სპეცოპერაცია მიმდინარეობს. ადგილზე იმყოფებიან შინაგან საქმეთა სამინისტროს შიდა ქართლის პოლიციის დეპარტამენტის და სამინისტროს სხვა დანაყოფები.

როგორც “ინტერპრესნიუსის” კორესპონდენტი შემთხვევის ადგილიდან იტყობინება, საქმე ეხება დიდი ოდენობით ნარკოტიკული საშუალებების ამოღებას და ნარკორეალიზატორების დაკავებას.

„შიდა ქართლის პოლიციის დეპარტამენტის და გორის რაიონის სამმართველოს თანამშრომლების მიერ მოსამართლის განჩინების საფუძველზე ქალაქ გორში ჩატარებულია მასშტაბური სპეცოპერაცია, რა დროსაც დაკავებულია რამდენიმე ნარკორეალიზატორი. ამ ეტაპზე მიმდინარეობს საგამოძიებო მოქმედებები“,- განაცხადა შიდა ქართლის პოლიციის დეპარტამენტის დირექტორის მოადგილე ვალერი თელიამ.