ჩვენ მზად ვართ ვემსახუროთ ამ ქალაქს იმისთვის, რომ კიდევ უფრო გავალამაზოთ, უფრო კომფორტული გავხადოთ, მეტი ინფრასტრუქტურა მოვაწესრიგოთ, გამართული საზოგადოებრივი ტრანსპორტი, რაც შეიძლება მეტი სკვერი, მეტი რეკრეაციული სივრცე, სპორტული მოედნები იმისათვის, რომ მეტი ხვიჩა კვარაცხელია გავუზარდოთ ჩვენს ქვეყანას,- ამის შესახებ თბილისის მერმა კახა კალაძემ თბილისის მთავრობის სხდომაზე განაცხადა.
მერმა თანამშრომლებს მადლობა გადაუხადა მუშაობისთვის და აღნიშნა, რომ მუნიციპალიტეტის თითოეული კეთილსინდისიერი თანამშრომლის შრომაზე დგას დედაქალაქის მუნიციპალიტეტი.
„მინდა კიდევ ერთხელ ამ ადამიანებს, ჩემს თანამშრომლებს მადლობა გადავუხადო იმისთვის, რასაც ისინი აკეთებენ ყოველდღიურ რეჟიმში ჩვენი ქალაქისთვის და ამ ქალაქში მცხოვრები ადამიანებისთვის. ჩვენ ძალიან ბევრი გამოწვევა, პრობლემა გვაქვს, მაგრამ ყველა შემართებით ვართ, ყველას გვაქვს მზაობა იმისა, რომ დავუპირისპირდეთ ამ პრობლემებს კონკრეტული საქმეებით, კონკრეტული პროექტებით, გადასადგმელი ნაბიჯებით იმისთვის, რომ ხვალინდელი თბილისი იყოს გაცილებით უკეთესი, ვიდრე დღეს არის და ვიდრე იყო გუშინ და გუშინწინ. ამის ყველანაირი რესურსი, შესაძლებლობა გაგვაჩნია. ჩვენ მზად ვართ გემსახუროთ, მზად ვართ ვემსახუროთ ამ ქალაქს იმისთვის, რომ კიდევ უფრო გავალამაზოთ, კიდევ უფრო კომფორტული გავხადოთ, მეტი ინფრასტრუქტურა მოვაწესრიგოთ, გამართული საზოგადოებრივი ტრანსპორტი, რაც შეიძლება მეტი სკვერი, მეტი რეკრეაციული სივრცე, სპორტული მოედნები იმისათვის, რომ მეტი ხვიჩა კვარაცხელია გავუზარდოთ ჩვენს ქვეყანას, მეტი წარმატებული ადამიანი გავუზარდოთ ჩვენს ქვეყანას. ეს არის ჩვენი მიდგომა და დამოკიდებულება“, - განაცხადა კახა კალაძემ.