კახა კალაძემ ივერთუბანში წყალარინების მიწისქვეშა სატუმბი სადგური დაათვალიერა

ჩუღურეთის რაიონში, ივერთუბნის დასახლებაში წყალარინების მიწისქვეშა სატუმბი სადგურის მშენებლობა დასრულდა.

პროექტი დედაქალაქის მერმა კახა კალაძემ მოადგილე ირაკლი ბენდელიანთან ერთად დაათვალიერა.

„ივერთუბნის დასახლებაში კიდევ ერთი მნიშვნელოვანი პროექტი განვახორციელეთ. აქ ძალიან ბევრი პრობლემა იყო - არ არსებობდა მიწისქვეშა კომუნიკაციები. პირველი, რაც იყო გასაკეთებელი, ეს იყო სატუმბი სადგურის მოწესრიგება, იმისთვის, რომ შემდეგ უკვე კონკრეტულ ქუჩებზე, კონკრეტულ დასახლებაში შევიდეთ და მოხდეს მიწისქვეშა კომუნიკაციების პროექტის განხორციელება და ოჯახების დაერთება. სატუმბი სადგური დღეს უკვე სატესტო რეჟიმში მუშაობს და რამდენიმე დღეში ოფიციალურად გადაეცემა კომპანია „ჯივიპის“ იმისთვის, რომ მოემსახუროს აქ მცხოვრებ ადამიანებს. პარალელურად, მიმდინარეობს დაქსელვის სამუშაოები და დაერთებები კონკრეტულ ქუჩებსა და ჩიხებში. აქ 1 100 ოჯახია და ძალიან ბევრ მათგანს სჭირდებოდა ამ პროექტის განხორციელება“, - განაცხადა კახა კალაძემ.

მისივე თქმით, ივერთუბნის დასახლებაში რეკრეაციული სივრცე მოეწყობა და საბავშვო ბაღის მშენებლობაც იგეგმება.

„გარდა ამისა, აქვე ძალიან დიდი პარკის მშენებლობა მიმდინარეობს. ესეც ჩვენი წინასაარჩევნო დაპირება იყო და უახლოეს მომავალში სამუშაოებსაც დავასრულებთ. ასევე, მალე გვექნება საბავშვო ბაღის პროექტი და დავიწყებთ მშენებლობას. საკმაოდ დასახლებული უბანია და ის დაპირება, რომელიც იყო მიცემული ამ ადამიანებისთვის, შესრულებული იქნება“, - აღნიშნა თბილისის მერმა.

სატუმბი სადგური რთული რელიეფის მქონე ტერიტორიაზე წყალარინების ქსელის გამართულ მუშაობას უზრუნველყოფს და ივერთუბნის დასახლების უმეტეს ქუჩებსა და ჩიხებს მოემსახურება. პროექტის ფარგლებში, დასახლებაში თანამედროვე ტიპის ტუმბოები და დიდი მოცულობის - 500 კვ.მეტრიანი საავარიო რეზერვუარი მოეწყო.

სატუმბ სადგურზე დაცულია ყველა სახის ჰიგიენური ნორმები. პარალელურად, წყალარინების ცენტრალური ქსელი მოეწყო ხუდადოვის, შერვაშიძის და ხერხეულიძეების ქუჩებზე, ასევე, შერვაშიძის III, IV და VI შესახვევებში. ამჟამად, ქსელის მოწყობა მიმდინარეობს შერვაშიძის I შესახვევში, ხოლო მოსახლეობის დაერთების სამუშაოები ხერხეულიძის ქუჩასა და შერვაშიძის I შესახვევში ხორციელდება. ამ დროისთვის, უკვე დაერთებულია 50 ოჯახი, ხოლო დანარჩენ ქუჩებზე ცენტრალური ქსელის მოწყობის და დაერთების სამუშაოები.

ივერთუბნის დასახლებაში წყალარინების სატუმბი სადგურის მშენებლობა მერიის ინფრასტრუქტურის განვითარების საქალაქო სამსახურმა განახორციელა, რაც დედაქალაქის ბიუჯეტიდან 2 105 111 ლარით დაფინანსდა.

პროექტი, მერთან ერთად, თბილისის მერიის ინფრასტრუქტურის განვითარების სამსახურის უფროსმა ლევან ნაროუშვილმა, ასევე, ჩუღურეთის რაიონის მაჟორიტარმა დეპუტატებმა - რიმა ბერაძემ და ზურაბ ჩიკვილაძემ დაათვალიერეს.

უკრაინაში შედგენილ სასანქციო სიაზე მომუშავე ჯგუფის წევრი სვეტლანა მუსიიაკა - სიაში დღეისთვის 19 ათასი ადამიანია, თუმცა ეს საწყისი ეტაპის სამუშაოა და სანქციებზე საბოლოო გადაწყვეტილება დამოკიდებული იქნება უსაფრთხოების საბჭოსა და შემდეგ უკვე პრეზიდენტზე
ქართული პრესის მიმოხილვა 30.09.2022
ვანო მაჭავარიანი -  თუ ხელისუფლებამ არ იაქტიურა, იყოს უკრაინა-მოლდოვა- საქართველოს სამეულის ნაწილი, ჩვენ აღმოვჩნდებით უკრაინა-მოლდოვას ევროპული და ატლანტიკური მომავლის მიღმა, რაც ქვეყნისთვის კატასტროფა იქნება
ვებ-გვერდ ss.ge-ზე ვიზიტორთა რაოდენობა 60 000-მდე გაიზარდა, მათ შორის 30% უცხო ქვეყნის მოქალაქეა
WhiteBit კრიპტოვალუტის ბირჟაზე ხელმისაწვდომი გახდა დოლარისა და ევროს გატანა Visa/Mastercard-ზე, ისევე როგორც უკრაინული გრივნის გატანა IBAN საბანკო ანგარიშის ნომერზე
„ჰიუნდაი ავტო საქართველომ“ 25 წლის იუბილე აღნიშნა
უძრავი ქონების პლატფორმას - Georgia Real Estate ახალი გენერალური დირექტორი ჰყავს
ბაზისბანკი, ბიზნესის დაკრედიტების ზრდის ტემპით, პირველ ადგილზეა
PSP “ჯანმრთელობის პროგნოზი“ - ახალ კამპანიას იწყებს