საქართველოს პროკურატურის ინფორმაციით, გენერალური პროკურორის მოადგილე ნათია მერებაშვილი ეუთო-ს თავმჯდომარეობის პირად წარმომადგენლებს შეხვდა.

უწყების ცნობით, შეხვედრაზე გენერალური პროკურორის მოადგილემ და გენერალური პროკურატურის ადამიანის უფლებათა დაცვის დეპარტამენტის უფროსმა შეუწყნარებლობით მოტივირებული დანაშაულის წინააღმდეგ ბრძოლის მიმართულებით პროკურატურის პოლიტიკასა და ბოლო წლებში გატარებულ იმ რეფორმებზე ისაუბრეს, რომელმაც მნიშვნელოვანი პროგრესი მოიტანა.

შეხვედრის ფარგლებში, ყურადღება საქართველოს პროკურატურასა და ეუთოს დემოკრატიული ინსტიტუტებისა და ადამიანის უფლებების ოფისის ODIHR-თან მრავალწლიან და შედეგზე ორიენტირებულ თანამშრომლობაზე გამახვილდა.

„საქართველოს გენერალური პროკურატურის ადამიანის უფლებათა დაცვის დეპარტამენტი 2015 წლიდან, საქართველოში, ეუთოს დემოკრატიული ინსტიტუტებისა და ადამიანის უფლებების ოფისის წარმომადგენელია. დეპარტამენტი საქართველოს სახელით შეუწყნარებლობის მოტივით ჩადენილი დანაშაულების შესახებ სტატისტიკას ყოველწლიურად აგროვებს და ავსტრიაში, ქალაქ ვენაში გამართულ ყოველწლიურ კონფერენციაზე, საქართველოს პროკურატურის მიერ განხორციელებული რეფორმები ბოლო წლებია პოზიტიურად ფასდება.

შეხვედრისას, მხარეებმა დისკრიმინაციის ნიშნით შეუწყნარებლობის მოტივით ჩადენილი დანაშაულის წინააღმდეგ ბრძოლაში სტატისტიკის წარმოების მნიშვნელობაზე ისაუბრეს. ამასთან, აღინიშნა, რომ საქართველოს პროკურატურის ორგანიზებით, 2020 წელს მემორანდუმი გაფორმდა, რომლის ფარგლებშიც, საქართველოს პროკურატურა, შინაგან საქმეთა სამინისტრო და უზენაესი სასამართლო დისკრიმინაციულ დანაშაულებზე ერთიანი მეთოდოლოგიით, საერთაშორისო სტანდარტებზე დაფუძნებულ სტატისტიკის 2020 წლიდან აწარმოებენ.

ეუთო-ს წარმომადგენლებს, ასევე ინფორმაცია დისკრიმინაციისა და შეუწყნარებლობით მოტივირებული დანაშაულის წინააღმდეგ ბრძოლის მიმართულებით პროკურატურის მიერ სამომავლოდ დაგეგმილი ღონისძიებებისა და პროკურატურის სტრატეგიაში განსაზღვრული აქტივობების შესახებ მიეწოდათ. განსაკუთრებული ყურადღება არასამთავრობო ორგანიზაციებთან და სამოქალაქო სექტორთან თანამშრომლობის გაღრმავებაზე გამახვილდა.

შეხვედრის მონაწილეებმა კიდევ ერთხელ აღნიშნეს ეუთოს როლი საქართველოში მართლმსაჯულების სისტემის განვითარების მიმართულებით და ნაყოფიერი და საუკეთესო თანამშრომლობის ფორმატის გაგრძელების თაობაზე მზაობა გამოხატეს.

გენერალურ პროკურატურაში გამართულ შეხვედრას გენერალური პროკურატურის ადამიანის უფლებათა დაცვის დეპარტამენტის უფროსი სალომე შენგელია, რასიზმის, ქსენოფობიისა და დისკრიმინაციის წინააღმდეგ ბრძოლის, ასევე ქრისტიანებისა და სხვა რელიგიის წარმომადგენლების მიმართ შეუწყნარებლობასა და დისკრიმინაციის საკითხებში ეუთო-ს თავმჯდომარეობის პირადი წარმომადგენელი პროფესორი რეჯინა პოლაკი, ანტისემიტიზმთან ბრძოლის საკითხებში ეუთო-ს თავმჯდომარეობის პირადი წარმომადგენელი, რაბი ენდრიუ ბეიკერი, მუსლიმთა მიმართ შეუწყნარებლობისა და დისკრიმინაციის წინააღმდეგ ბრძოლის საკითხებში ეუთო-ს თავმჯდომარეობის პირადი წარმომადგენელი ელჩი ისმაილ ჰაკი მუსა, ეუთო-ს პოლონეთის თავმჯდომარეობის სპეციალური მრჩეველი ევა საპიეზინსკა, რასიზმის, ქსენოფობიის საკითხებში ოდირი/ეუთო-ს მრჩეველი ტატიანა პერიჩი და ანტისემიტიზმის საკითხებში ოდირი/ეუთო-ს მრჩეველი მიკოლაი ვჟეჩენკოვსკი ესწრებოდნენ“, - აღნიშნულია გავრცელებულ ინფორმაციაში.