ლგბტქი+ ადამიანების უფლებათა დაცვის მხარდამჭერების რაოდენობა გაიზარდა,- ამის შესახებ ინფორმაციას ეროვნული-დემოკრატიული ინსტიტუტის (NDI) ჩატარებული გამოკითხვის საფუძველზე ავრცელებს.

გამოკითხულთა 38% მიიჩნევს, რომ მნიშვნელოვანია ლგბტქი+ ადამიანების უფლებათა დაცვა, მაშინ, როდესაც 2019 წელს მათი უფლებების დაცვას მნიშვნელობას გამოკითხულთა მხოლოდ 27% აღიარებდა. ამასთან, აღსანიშნავია, რომ თითქმის 38%-ისთვის არის უმნიშვნელო ლგბტქი+ ადამიანების უფლებათა დაცვა, თუმცა აღნიშნული ტენდენცია წინა წლებთან შედარებით კლებადია, რადგან მაგალითად 2019 წლისთვის 45% მიიჩნევდა, მათი უფლებების დაცვას უმნიშვნელოდ.

რაც შეეხება სხვა უმცირესობებს, გამოკითხულთა 92% მიიჩნევს, რომ შშმ პირების უფლებების დაცვა მნიშვნელოვანია, ამას უმნიშვნელოდ 5%-ზე ნაკლები მიიჩნევს. 81%-ისთვის ეთნიკური უმცირესობების უფლებების დაცვა მნიშვნელოვანია, და მხოლოდ 3%-ისთვის არის უმნიშვნელო. 79%-ისთვის მნიშვნელოვანია რელიგიური უმცირესობების უფლებების დაცვა, და 4%-ისთვის ეს უმნიშვნელოა.