პარლამენტმა დღევანდელ პლენარულ სხდომაზე პირველი მოსმენით განიხილა და 98 ხმით მხარი დაუჭირა პარლამენტის რეგლამენტში შესატან ცვლილებებს, რომლითაც პარლამენტის მიერ სახალხო დამცველის არჩევა ღია კენჭისყრით მოხდება.
ცვლილება რეგლამენტის 204-ე მუხლის მე-5 პუნქტში შედის, რომლის მიხედვით, იმ თანამდებობის პირთა ჩამონათვალს, რომელთა არჩევისას კენჭისყრა ფარულია, სახალხო დამცველი გამოაკლდება.
საკანონდებლო ინიციატივა პოლიტიკურმა ჯგუფმა “მოქალაქეებმა“ მოამზადა და მას უმრავლესობამ მხარი დაუჭირა.
“მოქალაქეების“ დეპუტატის ლევან იოსელიანის თქმით, ცვლილება საზოგადოებას საშუალებას მისცემს, თვალი მიადევნოს პარლამენტის წევრთა გადაწყვეტილების თანმიმდევრულობას კენჭისყრის შედეგების მიხედვით.
პარლამენტი კანონპროექტს დაჩქარებული წესით იხილავს.