სააგენტოს „აწარმოე საქართველოში“ და USAID-ის ეკონომიკური უსაფრთხოების პროგრამის ფარგლებში საქართველოს მეთიუ ზამიასი და ჰოლივუდის კინოინდუსტრიის წარმომადგენლები ესტუმრნენ. ამის შესახებ ინფორმაციას სააგენტო „აწარმოე საქართველოში“ ავრცელებს.

მათივე ინფორმაციით, სკაუტები საქართველოს კრეატიულ ინდუსტრიას და მის პოტენციალს გაეცნენ. ამასთანავე, დაათვალიერეს ქვეყნის მასშტაბით გადასაღებად საინტერესო ადგილები. სკაუტებისთვის შედგენილი ტური 16-22 სექტემბერს ჩატარდა და სტუმრებს საშუალებას მიეცათ დაეთვალიერებინათ თბილისი, მცხეთა, რუსთავი, ყაზბეგი და რამდენიმე ღირსშესანიშნავი ადგილი ბათუმში.

„ბევრი ადგილი გადამიღია და მინდა აღვნიშნო, რომ საქართველო სილამაზით არც ერთ ქვეყანას ჩამოუვარდება. მისი სილამაზისა და მზარდი კინოინფრასტრუქტურის გათვალისწინებით, ჩვენთვის დიდი პატივი იქნება შემდეგი პროექტის საქართველოში გადაღება“, – აღნიშნა მეთიუ ზამიასმა.

„აწარმოე საქართველოში“ 2016 წლიდან ახორციელებს პროგრამას „გადაიღე საქართველოში“, რომლის ფარგლებშიც ქვეყნის ტერიტორიაზე სცენების გადაღება უკვე განახორციელა არაერთმა კომპანიამ ევროპიდან, აზიიდან და ამერიკიდან.