საქართველოს სახელმწიფო საზღვრის უკანონო კვეთაში ბრალდებული ყოფილი პრეზიდენტის, მიხეილ სააკაშვილის სასამართლო პროცესი დღესაც გადაიდო.

სხდომა 4 ოქტომბერს, 13:00 საათზე გაიმართება.

თავად სააკაშვილი კვლავ კლინიკა "ვივამედშია" მოთავსებული.

კლინიკიდან გამოგზავნილი ცნობის მიხედვით, ისინი მიზანშეწონილად არ მიიჩნევდნენ სააკაშვილის დღევანდელ სასამართლო პროცესზე დასწრებას, რის გამოც, მოსამართლე ნინო ჩახნაშვილმა სხდომა გადადო.

შეგახსენებთ, რომ მიხეილ სააკაშვილის მიერ საზღვრის უკანონო კვეთის ფაქტთან დაკავშირებით გამოძიება პირველ ოქტომბერს დაიწყო. აღნიშნული საქმის ფარგლებში ბრალდება კიდევ 4 პირს - ელგუჯა ცომაიას, ზურაბ და შალვა წოწორიებსა და გიორგი ნარიმანიძეს აქვთ წაყენებული და ის ცალკე წარმოებად მიმდინარეობს.

აღნიშნული პირები ბრალს აღიარებენ.