საქართველოს პარალიმპიური კომიტეტის ორგანიზებით, საქართველოს კულტურის, სპორტისა და ახალგაზრდობის სამინისტროს, თბილისის მერიის ფინანსური მხარდაჭერით, თბილისში გაიმართება ევროპის ღია ჩემპიონატი პარაწოლჭიმში, რომელიც პარიზის 2024 წლის პარალიმპიური თამაშების წინა საკვალიფიკაციო ტურნირია. ჩემპიონატი 24-29 სექტემბერს გაიმართება. ამის შესახებ ინფორმაციას საქართველოს პარალიმპიური კომიტეტი ავრცელებს.

მათივე ინფორმაციით, 2022 წლის ევროპის ღია ჩემპიონატში 31 ქვეყანა, 300 პარასპორტსმენი და დელეგატი მიიღებს მონაწილეობას.

„24 სექტემბერს, 16:15-საათზე გაიმართება გახსნის ცერემონიალი, რომელსაც დაესწრებიან საქართველოს პარალიმპიური კომიტეტის პრეზიდენტი, პარლამენტის წევრი რატი იონათამიშვილი, საქართველოს კულტურის, სპორტისა და ახალგაზრდობის მინისტრის მოადგილე იოსებ ბაღათურია, პარლამენტის სპორტისა და ახალგაზრდულ საქმეთა კომიტეტის თავმჯდომარე ირაკლი მეძმარიაშვილი, თბილისის მერიის კულტურის, სპორტისა და ახალგაზრდულ საქმეთა სამსახურის უფროსი ირაკლი გვილავა, პარა წოლჭიმის მსოფლიო ფედერაციის და ბიზნეს სექტორის წარმომადგენლები”, - ნათქვამია ინფორმაციაში.