დავით მესხიშვილი - ასეთი მიდგომაა: „რუსული სანომრე ნიშანი აიღე და იგულავე“ - კანონის მოთხოვნები ვრცელდება ქართულ სანომრე ნიშნებზე, ხოლო შემოსულ ავტომობილებზე - არა

ვითხოვთ, რომ გზებზე კანონის აღსრულება ყველა კანონდამრღვევზე გავრცელდეს, მიუხედავად მათი მოქალაქეობისა და ავტომობილის რეგისტრაციის ადგილისა, - ამის შესახებ „ტრანსპორტისა და გზების ასოციაციის“ თავმჯდომარემ დავით მესხიშვილმა „ინტერპრესნიუსთან“ საუბრისას განაცხადა.

მისი შეფასებით, საქმე გვაქვს პროგრამულ გაუმართაობასთან, რადგან საზღვარზე დაფიქსირებული ავტომობილები ერთიან საინფორმაციო ბაზაში უნდა ხვდებოდნენ და შემდეგში კამერები მათ მიერ ჩადენილ სამართალდარღვევას უნდა აღიქვამდნენ, თუმცა, ეს ასე არ არის.

„როდესაც ვხედავთ საქართველოს საზღვარზე ავტომანქანების 30 კილომეტრიან რიგს, პირველი კითხვა ჩნდება - სად მიდის ეს 30 კილომეტრიანი ნაკადი? რა თქმა უნდა, მათი აბსოლუტური უმრავლესობა ხვდება დედაქალაქში. ობიექტურობა მოითხოვს აღინიშნოს, რომ უცაბედი კრიზისი, რაც დედაქალაქში საგზაო მოძრაობას უკავშირდება პირდაპირ დაკავშირებულია იმ საავტომობილო ნაკადებთან, რომელიც საზღვრიდან პრაქტიკულად უკონტროლოდ მოიწევს ძირითადად დედაქალაქისკენ. ამიტომ დამძიმებული საგზაო მოძრაობა დედაქალაქში ჩვენთვის გასაკვირი არ ყოფილა. ამ ქალაქში ხალხის რაოდენობა გაიზარდა ზუსტად იმ ნაკადების გამო, რომელიც ჩვენს საზღვართან არის კონცენტრირებული.

სრული პროტესტი გვაქვს, რადგან კანონის აღსრულება საქართველოში არის დისკრიმინაციული მიდგომებით და კანონის მოთხოვნები ვრცელდება საქართველოში რეგისტრირებულ ავტოსატრანსპორტო საშუალებებზე, ანუ ქართულ სანომრე ნიშნებზე, ხოლო შემოსულ ავტომობილებზე, რომელთაც აქვთ უცხო ქვეყნის სანომრე ნიშნები მათზე საქართველოს კანონმდებლობა არ ვრცელდება. მსგავსი ანალოგი მსოფლიოში არ მოიძებნება. სრულიად გაუგებარია ერთი და იგივე დარღვევაზე რატომ უნდა ჯარიმდებოდეს საქართველოს მოქალაქე საქართველოში რეგისტრირებული ავტომობილის შემთხვევაში, ხოლო რუსეთის მოქალაქე რუსეთში რეგისტირებული ავტომობილის შემთხვევაში - არა. უფრო მეტიც, მე პირადად შემხვდნენ ადამიანები, რომლებსაც პირადად უთქვამთ ჩემთვის - „რუსული სანომრე ნიშანი აიღე და იგულავე რამდენიც გინდა“, ეს მიდგომაა ბოლო პერიოდში. ყველაზე მომაკვდინებელი დარღვევაა სიჩქარის გადაჭარბება, რომელიც პირდაპირ არის დაკავშირებული სიკვდილიანობაზე ჩვენს გზებზე და სიჩქარის მთავარი მაკონტროლებელი ე.წ. ჭკვიანი კამერა რადართან ერთად, არ რეაგირებს უცხო ქვეყნის სანომრე ნიშნებზე. ჩვენ დაუყოვნებლივ ვითხოვთ, რომ კანონის აღსრულება გზებზე გავრცელდეს ყველა კანონდამრღვევზე მიუხედავად მათი მოქალაქეობისა და მიუხედავად მათი ავტომობილის რეგისტრაციის ადგილისა. კანონის წინაშე ყველა უნდა იყოს თანასწორი. დღეს გვაქვს სიტუაცია, რომ მხოლოდ საქართველოს მოქალაქეებს მოეთხოვებათ კანონის დაცვა და აქ შემოსულ ათიათასობით ადამიანს შეუძლია კანონი რეგულარულად დაარღვიოს და დაარღვიოს ის კანონი, რომელიც მსხვერპლს იწვევს გზებზე. ჩვენ როგორც ვხვდებით საქმე გვაქვს პროგრამულ გაუმართაობასთან. ეს ეხება არა მხოლოდ რუსულ სანომრე ნიშნებს, არამედ სხვადასხვა ქვეყნის სანომრე ნიშნებს. საზღვარზე ფიქსირდება ავტომობილი თავისი სანომრე ნიშნით და როგორც ჩანს, პრობლემაა პროგრამასთან მიმართებაში, რადგან ეს ავტომობილები უნდა ხვდებოდნენ ერთიან საინფორმაციო ბაზაში და შემდეგში კამერები უნდა აღიქვამდნენ ამ ავტომობილების მიერ ჩადენილ სამართალდარღვევას. როგორც ჩანს, პროგრამა არ არის გამართული“, - განაცხადა მესხიშვილმა.

გარდა ამისა, მან აღნიშნა, რომ ასოციაცია მზად არის შინაგან საქმეთა სამინისტროს თანამშრომლობის გზით, რეკომენდაციები მიაწოდოს, რადგან დღეს არსებული მდგომარეობა საგზაო უსაფრთხოების დონეს კიდევ უფრო გააუარესებს.

„კანონის წინაშე ყველა არის ვალდებული თანაბრად, თუმცა დღეს ეს პრინციპი დარღვეულია და საქართველოში რეგისტრირებულ ავტომობილებსაც უბიძგებს კანონდარღვევებისკენ, რადგან ხედავენ, რომ სხვა არღვევეს კანონს. ჯერ ისედაც გაუარესებულია საგზაო უსაფრთხოების დონე და აღნიშნული მდგომარეობა კიდევ უფრო გააუარესებს.

შინაგან საქმეთა სამინისტროს თანამშრომლობის გზით შეგვიძლია მივაწოდოთ გარკვეული რეკომენდაციები - პირველი ის, რომ პროგრამულად უნდა გაიმართოს სისტემა, რომელიც კანონის აღსრულებაშია ჩართული“, - განაცხადა დავით მესხიშვილმა.

მამუკა ხაზარაძე - ცვლილებების დროა! ხელისუფლება, რომელიც ემსახურება რუსეთს, უნდა დასრულდეს! „ლელო“ ემსახურება საქართველოს!
ემილ ავდალიანი - არაბული ქვეყნებისთვის და ირანისთვის ახლო აღმოსავლეთის რეგიონთან ჩინეთის ურთიერთობის სუფთა წარსული მეტად მიმზიდველია
ქართული პრესის მიმოხილვა 28.03.2024
საქართველოს თავდაცვის დილემა - რთული არჩევანი რთულ ვითარებაში
ამერიკული სამედიცინო ჰოლდინგი - CooperSurgical-ი საქართველოში ოვამედის ორგანიზებით სამდღიან სემინარს მართავს