ჯანდაცვის მინისტრის მოადგილე - სასწრაფო დახმარების თანამშრომლების ხელფასების ზრდა 2023 წლის ბიუჯეტში გათვალისწინებულია, თუმცა 100%-იანი ზრდა არ იქნება - მათი მოთხოვნა არარელევანტურია

სასწრაფო დახმარების თანამშრომლების ხელფასების ზრდა 2023 წლის ბიუჯეტში გათვალისწინებულია, თუმცა ეს 100%-იანი ზრდა არ იქნება - ვთვლით, რომ ხელფასის 100%-იან მომატებასთან დაკავშირებით მოთხოვნა არარელევანტურია, - ამის შესახებ ჯანდაცვის მინისტრის მოადგილემ, ილია ღუდუშაურმა „პალიტრანიუსის“ გადაცემა „დღის ნიუსრუმში“ განაცხადა.

მისივე თქმით, სასწრაფო დახმარების თანამშრომლებისთვის ხელფასის 100%-იანი ზრდა საკმაოდ სოლიდური მატებაა, რაც სამინისტროსთვის შეუსაბამოა.

„ის მოთხოვნები, რაც მათ ხელფასის 100%-იან მომატებასთან დაკავშირებით გააჩნიათ, ვთვლით, რომ არ არის რელევანტური, რადგანაც 100%-იანი მატება საკმაოდ სოლიდური მატებაა, რომელიც, ასე ვთქვათ, ვთვლით, რომ ჩვენთვის შეუსაბამოა“, - განაცხადა მინისტრის მოადგილემ.

მინისტრის მოადგილემ გადაცემაში ასევე ისაურა თურქეთიდან იპორტირებულ მედიკამენტებთან დაკავშირებით და აღნიშნა, რომ აგვისტოში, თურქეთიდან მედიკამენტების რეკორდული მოცულობის იმპორტი განხორციელდა.

მისივე თქმით, ამ ეტაპზე დაახლოებით, 200-ზე მეტი სახეობის მედიკამენტი არის იმპორტირებული.

„როდესაც თურქეთის ბაზარი გაიხსნა თავდაპირველად, შედარებით უფრო ნაკლები რაოდენობით მედიკამენტი შემოდიოდა, რადგან ლოჯისტიკის ასაწყობად ფარმაცევტულ კომპანიებს დრო სჭირდებოდათ. ეტაპობრივად მოცულობა იზრდება და ყველაზე მნიშვნელოვანი, რაც ჩვენ ოპტიმიზმის საშუალებას გვაძლევს, არის ის, რომ აგვისტოში რეკორდული იმპორტის მოცულობა დაფიქსირდა. წინა თვეებთან შედარებით ფაქტობრივად, გაორმაგებული იყო. ქართული ფარმაცევტული კომპანია უკვე ალღოს უღებს, თურქეთთან ლოჯისტიკურ ურთიერთობებს ალაგებს და შესაბამისად, ჩვენ გვაქვს მოლოდინი, რომ მომავალში თურქული მედიკამენტების იმპორტი უფრო და უფრო გაფართოვდება“, - აღნიშნა ილია ღუდუშაურმა.

მან გადაცემაში ასევე მედიკამენტებზე რეფერენტული ფასების დაწესებაზე ისაუბრა. ილია ღუდუშაურის თქმით, 2023 წლის იანვრიდან, ქრონიკული და ონკოლოგიური მედიკამენტების ფასებზე ზედა ზღვარი დაწესდება.

„ამ ეტაპზე უკვე შედგენილი გვაქვს ის მოდელი, რომელი მოდელითაც მაქსიმალური ფასები დაითვლება. ჩვენ საკანონმდებლო ცვლილებას ვამზადებთ იმისთვის, რომ ჯანდაცვის სამინისტროს საშუალება მიეცეს, რომ განსაზღვროს ჭერები. პრინციპში ჩვენმა ექსპერტებმა სამუშაოები დაასრულეს და ვფიქრობთ, რომ პირველ ეტაპზე პილოტურად ყველაზე რელევანტური იქნება, თუ ეს პროგრამა ისეთ მედიკამენტზე განხორციელდება, რომელიც არის ყველაზე მაღალფასიანი და ყველაზე ხშირად მოხმარებადი. ყველაზე ხშირად მოხმარებადი ქრონიკული მედიკამენტებია და ყველაზე მაღალფასიანი და მოწყვლადი ჯგუფებისთვის განკუთვნილი არის ონკოლოგიური მედიკამენტები“, - განაცხადა მინისტრის მოადგილემ.

კახა გოგოლაშვილი - ევროპარლამენტი საქართველოს ევროკავშირში ინტეგრაციის შესაძლებლობას ზრდის, ახლა ჯერი ჩვენზეა
ქართული პრესის მიმოხილვა 05.12.2022
დავით სიხარულიძე - ისტორიას არ ახსოვს, რომ რომელიმე ქვეყანა ძალით ნატო-ში, ან ევროკავშირში მიეღოთ
„ასტრაზენეკამ“ პროექტის „თანადგომა“ შემაჯამებელი ღონისძიება გამართა
ღვინო, რომელიც ბედნიერებას იმახსოვრებს - „მარნაველი“ - CBS ჯგუფის ახალი მიმართულება და 2022 წლის წარმატება ღვინის ბიზნესში
„კარფური" გაფართოებას აგრძელებს - თბილისში ახალი სუპერმარკეტი გაიხსნა
„ნიუ ჰოსპიტალსი“ აშშ-ის შეიარაღებული ძალების სამედიცინო სერვისების მომწოდებლად შეირჩა
გაფრთხილდი და გააფრთხილე, ჩვენი ფინანსების უსაფრთხოება ჩვენს ხელშია
„ლიბერთიმ“ განვადების აქცია დაიწყო
ბაზისბანკის ინვესტიციით, რუსთავში სავაჭრო ცენტრი და საცხოვრებელი კომპლექსი შენდება