სახალხო დამცველი დღეს უკრაინელებზე თუ ლაპარაკობ, მილიონ 200 ათასი კაცი მოკვდა ავღანეთში, სადაც ჩვენი ხალხი ჩასული იყო და 44 კაცი მოკვდა იქ, მაგრამ თქვენ ამაზე ხმას არ იღებთ. ისინი ხალხი არ იყვნენ? - ასე მიმართა „ევროპელი სოციალისტების“ დეპუტატმა ავთანდილ ენუქიძემ, პარლამენტის პლენარულ სხდომაზე სახალხო დამცველს, ნინო ლომჯარიას.

მისივე თქმით, სახალხო დამცველი პოლიტიკური პირის მსგავსი განცხადებებით არ უნდა გამოდიოდეს. ენუქიძის თქმით, პოლიტიკური განცხადებების კეთება არც ერთი სახალხო დამცველის პოზიცია არ არის, „თუ ის ყველა ხალხის დამცველია“.

„მე არ ვარ მომხრე, რა აგრესიასაც რუსეთი უკრაინაში აწარმოებს, მაგრამ მთელ მსოფლიოს ნუ იძახით. სახალხო დამცველი დღეს უკრაინელებზე თუ ლაპარაკობ, მილიონ 200 ათასი კაცი მოკვდა ავღანეთში, სადაც ჩვენი ხალხი ჩასული იყო და 44 კაცი მოკვდა იქ. ისიც იმ სახელმწიფოსთან მეგობრობის გულისთვის, რომელსაც ჩვენ ყველა სტრატეგიულ მეგობარს ვუძახით. მაგრამ თქვენ ამაზე ხმას არ ღებთ. რატომ ისინი არ განვიხილეთ? ისინი ხალხი არ იყვნენ?“ - განაცხადა ენუქიძემ.

მან ასევე, მმართველი გუნდის დეპუტატებს მიმართა და „ქართულ ოცნებას“ სახალხო დამცველის პოსტზე კანდიდატის დაყენებისკენ მოუწოდა.

„მე იმის მოწინააღმდეგეც ვიყავი, რომ კანდიდატს არ აყენებთ. რატომ არ აყენებთ? საქართველოს მოსახლობის უმრავლესობამ აგირჩიათ, ვის უკეთებთ ამ რევერანსებს, რომ კანდიდატურას არ აყენებთ? დააყენეთ კანდიდატურა და გაიყვანეთ ის თქვენი კანდიდატურა. აიღეთ პასუხისმგებლობა ყველაფერზე, სახალხო დამცველზეც და ყველაფერზეც“, - აღნიშნა ავთანდილ ენუქიძემ.

მან აქვე განაცხადა, რომ ის მომხრე არ არის საერთოდ ქვეყანაში სახალხო დამცველი იყოს.

„თუმცაღა მე მომხრე არა ვარ, რომ საერთოდ ომბუდსმენი იყოს, იმიტომ, რომ ჩვენ სწორება ამერიკის შეერთებულ შტატებზე გვაქვს და მათ ხომ უნდა მივბაძოთ? და აი, მივბაძოთ რა და არ იყოს“, - განაცხადა ავთანდილ ენუქიძემ.