იუსტიციის მინისტრმა რატი ბრეგაძემ საქართველოში ისრაელის ელჩთან, ჰადას მეიცადთან შეხვედრაზე საქართველოსა და ისრაელის იუსტიციის სამინისტროების ურთიერთობაში არსებული პროგრესის შესახებ ისაუბრა. ამის შესახებ ინფორმაციას იუსტიციის სამინისტრო ავრცელებს.

უწყების ცნობით, ორი ქვეყნის იუსტიციის სამინისტროებს შორის თანამშრომლობა განსაკუთრებით გაძლიერდა ერთობლივი დეკლარაციის გაფორმების შემდეგ, რომელსაც მიმდინარე წლის სექტემბერში ხელი მოაწერეს რატი ბრეგაძემ და ისრაელის ვიცე-პრემიერმა და იუსტიციის მინისტრმა გიდეონ საარმა. დეკლარაცია წარმოადგენს მხარეებს შორის 2021 წლის ოქტომბერში თელ-ავივში გაფორმებული მემორანდუმის გაგრძელებას და ითვალისწინებს ისეთ საკითხებში თანამშრომლობას, როგორიცაა: საჯარო სერვისების ხელმისაწვდომობა, ბიზნესისა და მიწის რეგისტრაცია, სანოტარო სერვისები, ელექტრონული აპოსტილი და სხვა.

როგორც მინისტრმა შეხვედრაზე აღნიშნა, ისრაელის იუსტიციის სამინისტროსთან თანამშრომლობის ფარგლებში გათვალისწინებული საკითხების სწრაფი და ეფექტიანი რეალიზაცია საქართველოს იუსტიციის სამინისტროსთვის პრიორიტეტულია. ორ ქვეყანას შორის არსებული თანამშრომლობის პრაქტიკულ განხორციელებას წარმოადგენს დეკემბერში დაგეგმილი სემინარი ისრაელის და საქართველოს იუსტიციის სამინისტროების თანამშრომლებს შორის.

ასევე, იუსტიციის მინისტრმა იმედი გამოთქვა, რომ ისრაელსა და საქართველოს შორის დარგობრივი ურთიერთობა მხარეების ერთობლივი ძალისხმევით კიდევ მეტად ინტენსიური გახდება.

ისრაელის ელჩთან გამართულ შეხვედრას ესწრებოდა იუსტიციის მინისტრის მოადგილე ბექა ძამაშვილი.