არ შეიძლება კანონი დავუწესოთ ცხოველს, ეს უაზრობაც არის ამიტომ, მოდით, ცოტა მეტი მოვთხოვოთ ადამიანებს, - ამის შესახებ ცხოველთა უფლებების დაცვის კომიტეტის თავმჯდომარე თინა ჭავჭანიძემ „პალიტრანიუსის“ გადაცემა „რეზიუმეში“ განაცხადა, რითაც გავრცელებულ ინფორმაციას გამოეხმაურა იმის შესახებ, რომ მიმდინარეობს მსჯელობა, კონკრეტული ჯიშის ძაღლების გამრავლება აიკრძალოს, აგრესიული ჯიშის ძაღლის გასეირნების უფლება კი 16 წლამდე ასაკის პირს შეეზღუდოს.

თინა ჭავჭანიძის თქმით, არის შემთხვევები, როცა პატრონები თავად წვრთნიან ძაღლებს, რათა აგრესიულები იყვნენ.

„პიტბულებს წვრთნიან ძალისმიერად, რათა აგრესიული იყოს და დაიცვას თავისი პატრონი ან მის მაგიერ ჩხუბში მიიღოს მონაწილეობა. ეს არის ცოტა სხვა მიდრეკილებების მქონე ადამიანებისთვის ძალიან იმედიანი თემა. ამიტომ პატრონები ცოტა მეტი პასუხისმგებლობებით უნდა დაიტვირთონ და არა პიტბული. პიტბული არ შეიძლება პასუხისმგებელი იყოს რამეზე. ხომ შეუძლებელია, რომ ლომს უთხრა - „შენ ესე არ ქნა“. კანონს ვუწერთ პასუხისმგებელ პირს, ძაღლი პასუხისმგებელი მე ჯერ არ გამიგია, არც ლომი და არც დელფინი და ა.შ. ჩვენ, ადამიანებმა ჩავთვალეთ, რომ ჩვენ ვართ სამყაროს გვირგვინი და კანონების დამწერი და არ შეიძლება კანონი დავუწესოთ ცხოველს, ეს უაზრობაც არის. ამიტომ, მოდით, ცოტა მეტი მოვთხოვოთ ადამიანებს“, - განაცხადა თინა ჭავჭანიძემ.

თინა ჭავჭანიძის თქმით, ძაღლის გამრავლების უფლება მხოლოდ სპეციალურ გამმრავლებელს უნდა ჰქონდეს.

„გამრავლების უფლება უნდა ჰქონდეს აუცილებლად მხოლოდ ბიზნეს ოპერატორს, რომელსაც ჰქვია გამმრავლებელი და ის უნდა იხდიდეს სახელმწიფო გადასახადს. ქუჩაში ჩვენ უკვე იმდენი ძაღლი გვყავს, რომ კიდევ გამრავლება არ გვჭირდება“, - განაცხადა თინა ჭავჭანიძემ.