საქართველოს ტურიზმის ეროვნული ადმინისტრაციის ორგანიზებითა და გერმანიის საერთაშორისო თანამშრომლობის საზოგადოების (GIZ) მხარდაჭერით, რაჭა-ლეჩხუმში გასტრონომიული ტური გაიმართა. ინფორმაციას ტურიზმის ეროვნული ადმინისტრაცია ავრცელებს.
მათივე ცნობით, ტურ-ოპერატორების, ჟურნალისტებისა და ფოტოგრაფებისგან შემდგარი 20-კაციანი ჯგუფი ამბროლაურისა და ცაგერის მუნიციპალიტეტებს ეწვია.
„ტურის მონაწილეებმა ჭრებალო და ღვირიში მოინახულეს. ჯგუფის წევრები ღვინის ქარხანას ეწვივნენ, სადაც რაჭული ღვინის დეგუსტაცია გაიმართა. ტურის ფარგლებში ადგილობრივი კერძების მასტერკლასი მოეწყო.
ტურ-ოპერატორებმა და მედიის წარმომადგენლებმა საოჯახო ეთნო მუზეუმი დაათვალიერეს, დაათვალიერეს ღვირიშის ჩანჩქერი.
გასტრო ტურის მიზანია ადგილობრივი სამზარეულოს წარმოჩენა, ადგილობრივი მეწარმეების/ოჯახების ხელშეწყობა, შიდა და საერთაშორისო მოგზაურთა ნაკადის გაზრდა რეგიონში, აგრეთვე „გემო-ფესტისთვის“ მომზადებული ტურისტული ინფრასტრუქტურის, საოჯახო სასტუმროებისა და კვების ობიექტების პოპულარიზაციაა.
ტურიზმის ეროვნული ადმინისტრაციის ორგანიზებით, გასტროტურიზმის ხელშეწყობის მიზნით, პირველად რაჭაში, აგვისტოში „გემო ფესტი“ გაიმართა. პროექტის ფარგლებში ფესტივალი სხვა რეგიონებშიც გაიმართება,“ - აღნიშნულია გავრცელებულ ინფორმაციაში.