კახეთში, სასტუმრო „ლოპოტაში“, „თიბისიმ” მცირე და საშუალო ბიზნესის წარმომადგენელებისათვის ფორუმი გამართა, სადაც ბიზნესისთვის აქტუალურ საკითხებზე ისაუბრეს. ამის შესახებ ინფორმაციას „თიბისი“ ავრცელებს.

მათივე ცნობით, ბიზნესის მხარდაჭერა და რეგიონული განვითარების ხელშეწყობა „თიბისისთვის“ პრიორიტეტული მიმართულებებია. რეგიონული ფორუმების მიზანი ადგილობრივი ბიზნესების მხარდაჭერა, სექტორში მიმდინარე სიახლეების გაცნობა და ინფორმაციის მიწოდებაა. 2022 წელს ეს რიგით მეხუთე ფორუმია, რომელიც „თიბისი ბიზნესის“ ორგანიზებით ჩატარდა.

„წლევანდელი რეგიონული ფორუმების სერია, რომელსაც „თიბისი ბიზნესის“ მხარდაჭერის მიზნით ახორციელებს, კახეთის, რიგით მე-5 ბიზნეს ფორუმით დაიხურა. წელს, რეგიონის სპეციფიკიდან გამომდინარე, კახეთში მეტი აქცენტი ექსპორტსა და ტურიზმზე გაკეთდა. ფორუმში 200-ზე მეტი ადგილობრივი კომპანიის წარმომადგენელი მონაწილეობდა“, - განაცხადა „თიბისის“ ბიზნესის მხარდაჭერის სერვის ექსპერტმა ანკა თოთიბაძემ.

ფორუმის სპიკერები დარგის გამოცდილი ექსპერტები იყვნენ, რომლებმაც ბიზნესებისთვის აქტუალურ თემებზე ისაუბრებს, მათ შორის, სოფლის მეურნეობის პროდუქტების საექსპორტო შესაძლებლობებზე, ფინანსური აღრიცხვიანობის სტანდარტის დანერგვაზე, კანონმდებლობაში მნიშვნელოვან საგადასახადო ცვლილებებზე, სასტუმროს მენეჯმენტზე, ბრენდისა და მარკეტინგის აქტუალურ საკითხებზე.

„ვისაუბრეთ ამ რეგიონისთვის ძალიან აქტუალური თემაზე - სასტუმროს მენეჯმენტზე და ოპერაციებზე. როგორ უნდა გავხსნათ და გავმართოთ სასტუმრო, რომ სწორად დაიწყოს ფუნქციონირება. ძალიან ბევრი გამოწვევა აქვს რეგიონს და ასეთი ტიპის ფორუმები ძალიან მნიშვნელოვანია ადგილობრივი ბიზნესისთვის“,- განაცხადა ბიზნეს კონსულტანტმა, ტრენერმა ტურიზმისა და მასპინძლობის მიმართულებით, ქეთი ალიმბარაშვილმა.

„თიბისის“ რეგიონული ფორუმების სერია წარმატებით გაგრძელდა კახეთში. ჩვენ ვისაუბრეთ ფინანსებზე სხვადასხვა მიმართულებით აუდიტორიისთვის საინტერესო საკითხებზე“, - განაცხადა საკონსულტაციო კომპანიის „ფინანსური ლაბორატორია“ მმართველმა პარტნიორმა შალვა ახრახაძემ.

„მე ვისაუბრე სასურსათო პროდუქციის საექსპორტო პოტენციალზე და იმ შესაძლებლობებზე, რაც აგრარულ სექტორს განვითარებადი ბაზრების მიმართულებით აქვს. მსგავსი ფორუმები, პირველ რიგში, არის კომუნიკაციის კარგი საშუალება კერძო სექტორსა და სხვა დამხმარე სექტორებისათვის, რაც ქვეყნის ეკონომიკური ზრდისთვის კრიტიკულად მნიშვნელოვანია“, - აღნიშნა ექსპორტის განვითარების ასოციაციის დირექტორმა გიორგი გუდაბანიძემ.

ფორუმის ერთ-ერთი მიზანი, ბიზნესების ერთად შეკრება და მათი კომუნის გააქტიურება, ერთმანეთში აზრების და გამოცდილების გაზიარებაა.

„ასეთი შეხვედრები მნიშვნელოვანია იმიტომ, რომ ვეცნობით ბიზნესის სხვადასხვა ასპექტებს და გამოცდილებას, რომელიც შეიძლება შემდეგში ჩვენს საქმიანობაში გამოვიყენოთ“, - განაცხადა სასტუმრო კომპლექს „ზუზუმბოს“ გენერალურმა მენეჯერმა ალექსი ბარათაშვილმა.

„ძალიან ნაყოფიერი შეხვედრა იყო, განსაკუთრებით ჩემთვის საინტერესო თემაზე, რაც კომპანიის ბრენდირებას შეეხება. ამ თემაზე ბევრი საინტერესო პასუხი მივიღე“, - აღნიშნა მარანი „მილორაულის“ დამფუძნებელმა სანდრო მილორავამ.

წელს „თიბისიმ“ რეგიონული ფორუმების სერიით საქართველოს შემდეგი რეგიონები დაფარა: შიდა ქართლი, იმერეთი, სამეგრელო, აჭარა და კახეთი. რეგიონული ფორუმები 2023 წელსაც გაგრძელდება.