არასამთავრობო ორგანიზაციის Art&Society ორგანიზებით და საქართველოს კულტურის, სპორტისა და ახალგაზრდობის სამინისტროს მხარდაჭერით, საერთაშორისო კარიკატურის ფესტივალი „ნიკო ფიროსმანი და მისი შემოქმედება“ ტარდება.

ორგანიზატორების ცნობით, ფესტივალი ნიკო ფიროსმანის დაბადებიდან 160 წლის იუბილეს ეძღვნება.

მათივე ინფორმაციით, პროექტი მიზნად ისახავს დიდი მხატვრის შესახებ ცნობადობის ამაღლებას და მისი შემოქმედების თანამედროვე ჭრილში გააზრებას.

„კონკურსში მონაწილეობა შეუძლიათ კარიკატურისტებს მსოფლიოს ყველა ქვეყნიდან. ქართველ და უცხოელ მხატვრებს ექნებათ 10-დღიანი სამუშაო ვადა, რომლის ფარგლებშიც უნდა მოამზადონ ნიკო ფიროსმანის ან მისი პერსონაჟების კარიკატურა (ზომებით 50X50 სმ). შესრულებულ ნამუშევართან ერთად მათ უნდა წარმოადგინონ 1-წუთიანი ვიდეო, სადაც ისაუბრებენ, თუ რა ინსპირაცია მისცა მათ ფიროსმანის ნამუშევრებმა და, ზოგადად, რას ნიშნავს ფიროსმანის არსებობა სამყაროსთვის.

ნამუშევრების მიღება დაიწყო 8 ნოემბერს და მთავრდება 19 ნოემბერს. მხატვრები ელექტრონულად გამოაგზავნიან ფიროსმანის ინსპირაციით შექმნილ ნამშევრებს, რომელსაც ჟიური შეაფასებს. დასკვნით ღონისძიებაზე, რომელიც 10 დეკემბერს გაიმართება, გამოვლინდება 3 გამარჯვებული. გამარჯვებულებს გადაეცემათ ფულადი პრიზები 1000 ევროს, 700 ევროს და 500 ევროს ექვივალენტი ლარში.

შემაჯამებელ გამოფენაზე წარმოდგენილი იქნება თანამედროვე კარიკატურისტების თვალით დანახული ფიროსმანი და მისი პერსონაჟები. პროექტის ფარგლებში დაიბეჭდება ორენოვანი (ქართულ-ინგლისური) ალბომი, რომელშიც მოცემული იქნება ქართველი და უცხოელი მხატვრების შექმნილი და ჟიურის მიერ შერჩეული 100 საუკეთესო კარიკატურა“, - აღნიშნულია ინფორმაციაში.