ანტიკორუფციულმა მოძრაობამ პარლამენტის შესასვლელთან აქცია-პერფორმანსი გამართა. მოძრაობის წევრებმა ირაკლი ღარიბაშვილის ფოტომასალა წარმოადგინეს, რომელიც მათივე შეფასებით პრემიერ-მინისტრის კორუფციულ საქმიანობას ასახავს.

„ირაკლი ღარიბაშვილი არის პოლიტიკურად მომართული ივანიშვილის მექანიკური თოჯინა, მთავარი სიმბოლო სახელმწიფოს ძარცვის და მთავარი წამხალისებელი ქვეყანაში სისტემური კორუფციის და ბიუჯეტის ფლანგვის, სახელმწიფო რესურსების დატაცების,“ - განაცხადა მოძრაობის ერთ-ერთმა ლიდერმა ლაშა ფარულავამ.

ორგანიზაციის კიდევ ერთი წევრის, ირაკლი ფავლენიშვილის განცხადებით კი, „ღარიბაშვილი თავის დროზე სწორედ ნეპოტიზმსა და კორუფციასთან დაკავშირებული ფაქტების გამო გაუშვეს პრემიერ-მინისტრობიდან“.

„ღარიბაშვილი არის საქართველოში გამეფებული ოლიგარქიული კორუმპირებული რეჟიმის სიმბოლო და საქართველოს ეროვნულო ინტერესების ხარჯზე მდიდრდება თავის კლანთან ერთად,“ - განაცხადა ირაკლი ფავლენიშვილმა.

ამასთან, კიდევ ერთი აქტივისტის, ტიტე გედენიძის თქმით, კითხვებს იწვევს ირაკლი ღარიბაშვილის ქონებრივ დეკლარაციაში დაფიქსირებული ინფორმაციაც.

„ასეთია მანქანები, პენსიონერი მშობლების მიერ ჩარიცხული კოლოსალური თანხები, ხოლო მასთან დაკავშირებული კახური კლანი საქართველოში ფლობს ბიზნესებს, რომლებიც იგებენ საჯარო უწყებების ტენდერებს, მაგალითად, ჯანყარაშვილის კომპანია „სერპანტინი“ საჯარო უწყებებიდან ყოველწლიურად იღებს მილიონობით ლარს,“ - განაცხადა გედენიძემ.

შეგახსენებთ, დღეს პრემიერ- მინისტრი ირაკლი ღარიბაშვილი პარლამენტში ინტერპელაციის წესით არის დაბარებული.