ოთარ შამუგია უნგრეთის ელჩს შეხვდა
გარემოს დაცვისა და სოფლის მეურნეობის მინისტრი ოთარ შამუგია უნგრეთის ელჩს საქართველოში ანა მარია შიკოს შეხვდა.
გარემოს დაცვისა და სოფლის მეურნეობის სამინისტროს მიერ გავრცელებული ინფორმაციით, მინისტრმა მადლობა გადაუხადა ელჩს მრავალწლიანი თანამშრომლობისთვის და გარემოს დაცვისა და სოფლის მეურნეობის განვითარების მიმართულებით უნგრეთის გამოცდილების გაზიარების სურვილი გამოთქვა.
მათივე ცნობით, შეხვედრისას საუბარი შეეხო აგროტურიზმის განვითარების, ღვინის ექსპორტის ზრდის, სათესლე მასალის წარმოების, აგრარული პროდუქციის წარმოებისა და მესაქონლეობის სექტორის მიმართულებით თანამშრომლობის გაღრმავების საკითხებს.
„ქვეყნის ევროკავშირთან დაახლოების პროცესში, უნგრეთის გამოცდილების გაზიარება განსაკუთრებით მნიშვნელოვანია. ჩვენი ამოცანაა, ქვეყნის სასურსათო უსაფრთხოების უზრუნველყოფა და ფერმერების დახმარება მეტი და ხარისხიანი პროდუქციის წარმოების მიზნით. ერთობლივი ძალისხმევით, ვფიქრობ, თანამშრომლობა ორმხრივად სასარგებლო იქნება“, - განაცხადა ოთარ შამუგიამ.
გარემოს დაცვისა და სოფლის მეურნეობის სამინისტროს ცნობით, ანა მარია შიკომ ქვეყნებს შორის არსებული მეგობრული და მჭიდრო პარტნიორული ურთიერთობების მნიშვნელობის შესახებ ისაუბრა და საქართველოსთან, როგორც საიმედო პარტნიორ ქვეყანასთან სოფლის მეურნეობის და გარემოსდაცვითი მიმართულებით თანამშრომლობის გაღრმავების სურვილი გამოთქვა.
როგორც უნგრეთის ელჩმა აღნიშნა, მოხარული იქნება თუ უნგრეთში მეტ ქართულ, ხოლო საქართველოში მეტ უნგრულ პროდუქტს იხილავს.
გარემოს დაცვისა და სოფლის მეურნეობის სამინისტროში გამართულ შეხვედრას შესაბამისი სამსახურის წარმომადგენლები ესწრებოდნენ.
v-if="article.gallery" v-html="article.gallery"
