სს “ენერგო-პრო ჯორჯიას“ დასავლეთ საქართველოს ცენტრალური ფილიალის ვანის მომსახურების ცენტრს, კახეთის ფილიალის ყვარლის მომსახურების ცენტრს და აღმოსავლეთ საქართველოს ფილიალის გარდაბნის მომსახურების ცენტრს მადლობის სიგელები გადაეცათ.
“ენერგო-პრო ჯორჯიას“ მიერ გავრცელებული ინფორმაციით, შრომის უსაფრთხოების მიმართულებით მიღწეული შედეგებისთვის, კომპანიის ხელმძღვანელობისგან მადლობა მომსახურების ცენტრების პერსონალს, ფილიალების დირექტორებმა და მთავარმა ინჟინრებმა გადასცეს.
მათივე ცნობით, ბოლო 3 წლის შედეგების მონიტორინგის მონაცემებით, შრომის უსაფრთხოების წესების დაცვისა და კონტროლის კუთხით, ვანის მომსახურების ცენტრში ყველაზე კარგი შედეგი დაფიქსირდა კომპანიის მასშტაბით. მეორე ადგილს ინაწილებენ ყვარლის და გარდაბნის მომსახურების ცენტრები. აღნიშნულის საფუძველზე „ენერგო-პრო ჯორჯიას“ ადმინისტრაციამ, მომსახურების ცენტრების მთელს პერსონალს მადლობა გამოუცხადა და გადაწყვეტილება მიიღო მათი მატერიალური წახალისების შესახებ.
„შრომის უსაფრთხოება ერთ-ერთი პრიორიტეტული მიმართულებაა კომპანიაში. დანერგილი გვაქვს შრომის უსაფრთხოების მართვის სისტემა, რომელიც საერთაშორისო გამოცდილებას ეფუძნება და პერიოდულად ტრენინგებს, პრაქტიკულ სწავლებებს, გამოცდებს და სხვა ღონისძიებებს გულისხმობს“ - განაცხადა კომპანიის შრომის უსაფრთხოების დეპარტამენტის უფროსმა, ალეკო ნემსაძემ.