სპეციალური საგამოძიებო სამსახურის უფროსმა კოკა კაციტაძემ მოადგილეებთან - გიორგი კვარაცხელიასთან და ნათია სონღულაშვილთან ერთად, ბელგიის სამეფოს ახლად დანიშნულ ელჩთან მიშელ პიტერმანსთან გაცნობითი ხასიათის შეხვედრა გამართა. ინფორმაციას სპეციალური საგამოძიებო სამსახური ავრცელებს.

მათი ცნობით, შეხვედრაზე მხარეებმა ორმხრივი თანამშრომლობის საკითხები განიხილეს.

„დამოუკიდებელი საგამოძიებო სამსახურის უფროსმა საქმიანობის ძირითად მიმართულებებზე, განსახორციელებელ რეფორმებზე და თანამშრომლობის მნიშვნელობაზე ისაუბრა. ასევე, საუბარი შეეხო სპეციალურ საგამოძიებო სამსახურსა და ბელგიის პოლიციის მონიტორინგის მუდმივმოქმედ კომიტეტს (Standing Committee P) შორის მჭიდრო კავშირის ჩამოყალიბებას და მათი მრავალწლიანი გამოცდილების გაზიარებას.

ბელგიის პოლიციის მონიტორინგის მუდმივმოქმედი კომიტეტი (Standing Committee P) - პარლამენტის წინაშე ანგარიშვალდებული დამოუკიდებელი და ნეიტრალური ორგანოა, რომელიც ბელგიის პოლიციის საქმიანობას უწევს მონიტორინგს.

კოკა კაციტაძემ მიშელ პიტერმანს სპეციალური საგამოძიებო სამსახურის საქმიანობის მიმართ გამოჩენილი ყურადღებისა და მხარდაჭერისთვის მადლობა გადაუხადა.

შეხვედრას სპეციალური საგამოძიებო სამსახურის საერთაშორისო ურთიერთობების დეპარტამენტის უფროსი - ნათია ფირაშვილი და ამავე დეპარტამენტის წარმომადგენელი ანა ქუთათელაძე ესწრებოდნენ“, - აღნიშნულია ინფორმაციაში.