ჩვენ ერთგული ვრჩებით ბუქარესტის სამიტზე მიღებული გადაწყვეტილების. ნატო-ს კარი ღია რჩება, - ამის შესახებ ნატო-ს გენერალურმა მდივანმა, იენს სტოლტენბერგმა ბუქარესტში გამართულ ფორუმზე განაცხადა, რითაც მან უპასუხა შეკითხვას იმის შესახებ, რომ 2008 წელს, ნატო-ს მოკავშირეებმა განაცხადეს, რომ უკრაინა და საქართველო გახდებიან ნატო-ს წევრები და რა ეტაპზეა ამჟამად ეს პროცესი.

„ნატო-ს კარი ღია რჩება. ჩვენ ეს ვაჩვენეთ მონტენეგროსა და ჩრდილოეთ მაკედონიის ალიანსში მიღებით მიუხედავად რუსეთის პროტესტისა, ვაჩვენეთ, რომ რუსეთს არ აქვს ვეტოს უფლება და ალიანსში გაწევრიანება მხოლოდ ნატო-ს 30 წევრისა და ასპირანტი ქვეყნების გადასაწყვეტია და არა სხვისი. როდესაც პუტინი შეიჭრა უკრაინაში, მას უნდოდა ნაკლები ნატო თავის საზღვრებთან და მიიღო საპირისპირო. მან მიიღო ნატო-ს ჯარების მეტი ყოფნა ალიანსის აღმოსავლეთ ნაწილში და ის ნახავს ფინეთისა და შვედეთის ნატო-ში გაწევრიანებას. ასე რომ ჩვენ ვაჩვენებთ, რომ ნატო-ს კარი ღიაა არა მხოლოდ სიტყვებით, არამედ საქმითაც და ეს იყო ბუქარესტში მიღებული გადაწყვეტილების ნაწილი“, - აღნიშნა სტოლტენბერგმა.

მისი თქმით, ამჟამად ალიანსი ფოკუსირებულია უკრაინის მხარდაჭერაზე, რათა უზრუნველყოფილი იქნას, რომ ვლადიმერ პუტინი დამარცხდეს და გაიმარჯვოს უკრაინამ, როგორც სუვერენულმა, დამოუკიდებელმა სახელმწიფომ.