საქართველოს მესამე პრეზიდენტის ადვოკატის, შალვა ხაჭაპურიძის განცხადებით, მოსამართლე გიორგი არევაძის განჩინების თანახმად სპეციალურ პენიტენციურ სამსახურს 14 იანვრამდე აქვს დრო, რომ ადვოკატებს მიხეილ სააკაშვილის კლინიკა „ვივამედში“ და ციხის საავადმყოფოში ყოფნის ვიდეო მასალები გადასცეს.

მისი განმარტებით, თუ სპეციალური პენიტენციური სამსახური ვიდეო კადრებს არ გადასცემს, ის 15 იანვარს მოსამართლის გადაწყვეტილების არ აღსრულებაზე, სპეციალურ საგამოძიებო სამსახურს გამოძიების დაწყებისთვის მიმართავს.

როგორც ხაჭაპურიძემ კლინიკა „ვივამედში“ მიხეილ სააკაშვილის მონახულების შემდეგ ჟურნალისტებთან აღნიშნა, მიხეილ სააკაშვილს კვლავ მაღალი ტემპერატურა აქვს.

„ტემპერატურა მაღალი, სიმპტომები დემენციის, სიმპტომები კახექსიის და ის დაავადებები, რაც აქვს, რომელიც დღითიდღე უძლიერდება და უძლიერდება.

გარკვეული გართულებები დემენციის და კახექსიის კიდევ უფრო მეტად გამოკვეთილია. ექიმებთან კომუნიკაცია მქონდა და მათგან მოვისმინე ეს ყველაფერი. ექიმებმა და მედ-პერსონალმა გუშინდელ სასამართლო პროცესს მოუსმინეს და იმ სიმპტომებს დაეთანხმნენ, რომელიც ექსპერტმა შაჰინ ლახანმა თავის ჩვენებაში გააჟღერა.

კიდევ ერთხელ შევახსენებ ხელისუფლებას, 14-ში გადის ვადა კადრების გადმოცემის შესახებ. 14-ში არ გვექნება კადრები და 15-ში უკვე სპეციალურ საგამოძიებო სამსახურს მივმართავთ დაიწყოს გამოძიება მოსამართლის გადაწყვეტილების არ აღსრულებაზე“,-განაცხადა ხაჭაპურიძემ.