პენიტენციურმა სამსახურმა სასამართლოს მიხეილ სააკაშვილის საქმეზე ექსპერტიზის ეროვნული ბიუროს მიერ მომზადებული დასკვნა წარუდგინა - მომდევნო პროცესი 30 იანვარს ჩაინიშნა

სპეციალურმა პენიტენციურმა სამსახურმა თბილისის საქალაქო სასამართლოში მიხეილ სააკაშვილის საქმეზე ლევან სამხარაულის სახელობის სასამართლო ექსპერტიზის ეროვნული ბიუროს მიერ მომზადებული ექსპერტიზის დასკვნა წარადგინა.

როგორც პენიტენციური სამსახურის იურისტმა, ნიკა აბრამიშვილმა განაცხადა, აღნიშნული დასკვნა ცენტრ „ემპათიის“ მიერ გამოტანილ დიაგნოზებს ეხება, რაც საქმის მასალებს მტკიცებულების სახით უნდა დართვოდა.

აღნიშნულ შუამდგომლობაზე პოზიციას დაცვის მხარე მომდევნო სხდომაზე დააფიქსირებს.

„ცენტრ „ემპათიის“ მიერ წარმოდგენილმა დასკვნებმა მთელი რიგი კითხვები გააჩინა, რომელიც პენიტენციურ სამსახურს აქვს. ჩვენ სასამართლოშიც ვშუამდგომლობდით, რომ ექსპერტიზა დანიშნულიყო. ამ დასკვნაში მითითებული საკითხები სპეციალურ ცოდნას საჭიროებს, რომელიც გააჩნია შესაბამის დარგის ექსპერტებს. აღნიშნულიდან გამომდინარე, 2022 წლის 8 დეკემბერს, სპეციალურმა პენიტენციურმა სამსახურმა სამხარაულის ექსპერტიზის ეროვნულ ბიუროს მიმართა. კერძოდ, დასკვნაში წარმოდგენილი დიაგნოზები შესაბამისი იყო თუ არა, საქართველოს ჯანდაცვის მინისტრის ბრძანებასთან, რომელიც განსაზღვრავს მსჯავრდებულის გათავისუფლებისთვის წარდგენილ საფუძვლებს. სპეციალურმა პენიტენციურმა სამსახურმა გუშინ მიიღო აღნიშნული დასკვნა, შესაბამისად, მოკლებული ვიყავით შესაძლებლობას, მანამდე სასამართლოსთვის აღნიშნული დასკვნა მიგვეწოდებინა. სასამართლოს წარმოვუდგენთ ლევან სამხარაულის სახელობის ექსპერტიზის ბიუროს დასკვნას, ასევე მხარეებს გადავცემთ“, - განაცხადა აბრამიშვილმა.

აღნიშნულის შემდეგ, სააკაშვილის ადვოკატმა, შალვა ხაჭაპურიძემ პენიტენციურ სამსახურს შუამდგომლობის დაყენება და კონკრეტული მუხლიდან ნორმის მითითება სთხოვა, თუ რის საფუძველზე წარადგინეს აღნიშნული განცხადება. პენიტენციურმა სამსახურმა რამდენიმეწუთიანი შესვენების შემდეგ, შუამდგომლობა წერილობით წარადგინა.

რაც შეეხება თავად ექსპერტიზის დასკვნას, როგორც ხაჭაპურიძემ განმარტა, „აღნიშნულის გაცნობას დრო უნდა, რის გამოც, პოზიციას შემდეგ სასამართლო პროცესზე წარადგენს“.

სასამართლოში ჩვენების მიცემა მოუწევთ წარდგენილი დასკვნის ავტორებს, ნოდარ კაკაბაძეს, ნანა კეკელიძესა და აკაკი ტყემალაძეს.

მიხეილ სააკაშვილისთვის სასჯელის გადავადების, ან გათავისუფლების საკითხზე სასამართლო პროცესი 30 იანვარს, 11:00 საათზე გაიმართება.

რობინ დანიგანი - ვცდილობთ თუ არა ქართველი ხალხის დასანქცირებას? ცალსახად არა! ჩვენ გვსურს საუკეთესო ამ ქვეყნისთვის და გვსურს, რომ ეს ქვეყანა წარმატებული იყოს
ქართული პრესის მიმოხილვა 17.06.2024
ესტონეთის ელჩი - თუ გვინდა ევროკავშირის წევრობა, უნდა ვითამაშოთ წესების მიხედვით - საქართველოს ხელისუფლება ამბობს, რომ უახლოვდება ევროკავშირს, მაგრამ მათი ქმედებები ამას არ ადასტურებს
„დაგროვებითი პენსიის შესახებ“ კანონში ცვლილებები შედის - რა სიახლეებს უნდა ელოდონ საპენსიო სქემის მონაწილეები
როგორ ვებრძოლოთ მოგზაურთა დიარეას
„სიმეტრია პარკი“ მთაწმინდის რაიონში კომერციული ფართის მშენებლობის დასრულებას აანონსებს
ISET-ის ფინანსების სამაგისტრო პროგრამამ CFA ინსტიტუტთან აფილირება მიიღო
„ბიზნეს ოსკარად“ წოდებული „ოქროს ბრენდის“ დაჯილდოებაზე PSP კვლავ N1 ფარმაცევტულ ბრენდად აღიარეს