ეს დოკუმენტი სასამართლო პროცესის მიმართულებას ვერანაირად ვერ შეცვლის - რაც მეტს სიღრმეებში წავალთ, უფრო მეტი სიყალბე ამოტივტივდება, - ამის შესახებ საქართველოს მესამე პრეზიდენტის უფლებადამცველმა, შალვა ხაჭაპურიძემ თბილისის საქალაქო სასამართლოს მოსამართლის, გიორგი არევაძის გადაწყვეტილებაზე კომენტირებისას განაცხადა, რომელმაც სააკაშვილის ჯანმრთელობასთან დაკავშირებით ცენტრ „ემპათიას“ დასკვნაზე ექსპერტიზის ბიუროს დასკვნა საქმეს მტკიცებულებად დაურთო.

მისივე თქმით, წარმოდგენილი ექსპერტიზის დასკვნა არაკომპეტენტური და მიკერძოებული პირების მიერაა გაცემული.

„ჩვენ მოსამართლეს დავუდასტურეთ დოკუმენტურად, რომ დასკვნა ყალბია. გაცემულია სხვა მტკიცებულებებზე, რომელიც მარიამ ჯიშკარიანის დასკვნაში გაცემული არ არის. გარდა ამისა, დავადასტურეთ ის გარემოება, რომ წარმოდგენილი ექსპერტიზის დასკვნა გაცემულია არაკომპეტენტური და მიკერძოებული პირების მიერ. სასამართლომ გადაწყვეტილება მიიღო, ამ დასკვნის დართვის და სასამართლოზე გამოკვლევის შესახებ. ამ ნაწილში მხარე არ შეზღუდა. პროცესი უნდა გავაგრძელოთ იმიტომ, რომ ფიზიკურად სხვა გამოსავალი არ გვაქვს. ადამიანი კვდება და ახლა იმის დრო ჩვენ არ გვაქვს, რომ პროცესუალური სვლები ვაკეთოთ. ეს დოკუმენტი ვერანაირად ვერ შეცვლის სასამართლო პროცესის მიმართულებას, იმიტომ, რომ სასამართლო პროცესზე, რაც მეტს სიღრმეებში წავალთ, უფრო მეტი სიყალბე ამოტივტივდება“, - განაცხადა ხაჭაპურიძემ.