გორის მუნიციპალიტეტის სოფელ კარბში, მეზობლებს შორის საყოფაცხოვრებო ნიადაგზე მომხდარი დაპირისპირებისას გარდაცვლილი 33 წლის ლევან გვიმრაძის საქმეზე, გორის რაიონულ სასამართლოში ნაფიცი მსაჯულები ვერდიქტს სავარაუდოდ, დღეს გამოიტანენ.

ბრალდებული, რომელსაც მომხდარი ფაქტიდან 2 კვირაში გორის რაიონულმა სასამართლომ აღკვეთის ღონისძიებად პატიმრობა შეუფარდა, გარდაცვლილის თანასოფლელი 68 წლის ქალია.

შემთხვევა 2022 წლის 10 ივლისს მოხდა. მეზობლებს შორის სარწყავ წყალზე მომხდარი ჩხუბის დროს, ასაკოვანმა ქალმა მეზობელ მამაკაცს თავში ბლაგვი საგანი ჩაარტყა. დაშავებული საავადმყოფოში გადაიყვანეს, სადაც ქალა-ტვინის ტრავმის გამო გადაუდებელი ქირურგიული ოპერაცია ჩაუტარდა, თუმცა, ექიმების თქმით, მიღებული დაზიანება სიცოცხლესთან შეუთავსებელი იყო და ჩატარებული ინტენსიური მკურნალობის მიუხედავად, პაციენტი გარდაიცვალა.

მომხდარ ფაქტზე გამოძიება საქართველოს სისხლის სამართლის კოდექსის 117-ე მუხლით (ჯანმრთელობის განზრახ მძიმე დაზიანება, რამაც სიცოცხლის მოსპობა გამოიწვია) მიმდინარეობს.

გარდაცვლილის ოჯახის წევრებმა და ახლობლებმა გორის რაიონულ სასამართლოსთან რამდენიმე დღის წინ აქცია გამართეს მოთხოვნით - ,,დაისაჯონ მკვლელები“. გარდაცვლილის ნათესავები მუხლის გადაკვალიფიცირებას და დაკავებულისთვის ბრალის დამძიმებას ითხოვენ, ამასთანავე, გვიმრაძის ოჯახის წევრების მტკიცებით, ბრალდებული ქალის გარდა, აღნიშნულ დაპირისპირებაში სხვა პირებიც მონაწილეობდნენ, რომელთა პასუხისმგებლობის საკითხი არ დამდგარა.