მოსამართლე არევაძეს ეტყობა ძალიან ეშინია ჩემი და ჩვენი საერთო დასკვნის, შესაბამისად, მიიღო ასეთი გადაწყვეტილება, რომ არასოდეს დავესწრო სასამართლოს, ან არ მოვიდე მეორეჯერ მოწმედ. ეს არის მოსამართლის მხრიდან პრევენციული ზომა, - ამის შესახებ ცენტრ "ემპათიის" დირექტორმა მარიამ ჯიშკარიანმა სასამართლო პროცესიდან გაძევების შემდეგ ჟურნალისტებს განუცხადა.

ჯიშკარიანმა სასამართლო დარბაზიდან მისი გაძევების მიზეზზე ისაუბრა და აღნიშნა, რომ გადაწყვეტილება იყო არაკანონიერი.

„კომისიური ექსპერტიზის დროს, ექსპერტები ერთად მუშაობენ. მე უკვე გამოკითხული ვარ და, შესაბამისად, უფლება მაქვს სასამართლო დარბაზში ვიჯდე. არავის არაფერს ვკარნახობდი.

რაც შეეხება სასამართლო პროცესს და მოსამართლის გადაწყვეტილებას, ეს არის არაკანონიერი გადაწყვეტილება. მოსამართლე არევაძეს ეტყობა ძალიან ეშინია ჩემი და ჩვენი საერთო დასკვნის. შესაბამისად, მიიღო ასეთი გადაწყვეტილება, რომ მე არასოდეს დავესწრო ამ სასამართლოს, ან არ მოვიდე მეორეჯერ მოწმედ. ეს არის მოსამართლის მხრიდან პრევენციული ზომა.

რაც შეეხება ექსპერტის, გალინა კალუშინას დაკითხვას, პენიტენციური მხარე მისი კომპეტენციის ფარგლებს გარეთ აძლევს შეკითხვებს და, სწორედ ამას მოყვა ჩემი კომენტარი. მოსამართლეს ხმამაღლაც განვუცხადე, რომ ექსპერტიზის ხელმძღვანელი მე ვიყავი და თუკი ფრჩხილის და თმის ნიმუშების აღებისას ხელმოწერა იყო საჭირო, ჩემ გარდა სხვა წევრი ვერ მოაწერდა ხელს. ჩვენ არ შეგვიშვეს და ეს ძალიან კარგად იცის მოსამართლემ. შესაბამისად, შეკითხვები, რასაც ახლა პენიტენციური სამსახური უსვამს ჩვენს ექსპერტს, გასულია მისი კომპეტენციის ფარგლებიდან. მათ მცდარი წარმოდგენა აქვთ კომისიური წესით ექსპერტიზის თაობაზე“, - განაცხადა ჯიშკარიანმა.

მანამდე, თბილისის საქალაქო სასამართლოს მოსამართლემ, გიორგი არევაძემ საქართველოს ყოფილი პრეზიდენტის, მიხეილ სააკაშვილის სასჯელის გადავადების, ან სასჯელისგან გათავისუფლებასთან დაკავშირებით სასამართლო პროცესიდან ცენტრ "ემპათიის" დირექტორი მარიამ ჯიშკარიანი გააძევა.