ანსამბლ „რუსთავის“ მომღერლები გერმანიასა და პოლონეთში კონცერტებს გამართავენ. როგორც „ინტერპრესნიუსს“ ანსამბლ „რუსთავიდან“ აცნობეს, პირველი კონცერტი 12 თებერვალს გერმანიის დედაქალაქში გაიმართება.
საქართველოს ტრადიციული ხალხური სიმღერისა და ცეკვის სახელმწიფო აკადემიური ანსამბლ „რუსთავის" სამხატვრო ხელმძღვანელის, გიორგი ნატროშვილის განცხადებით, "რუსთავის" მომღერლები ბერლინში, ჰამბურგსა და ვარშავაში მაყურებლის წინაშე ტრადიციულ ხალხურ სიმღერებს, ოთარ თაქთაქიშვილის სუიტას(მეგრული სიმღერები), იოსებ ბარდანაშვილის ნაწარმოებს "ფრთაო ნათლისაო" და ინგლისელი კომპოზიტორის დევიდ ბრუსის კომპოზიციას შეასრულებენ. აღნიშნული ნაწარმოები ქართულ ენაზე სპეციალურად ანსამბლ "რუსთავისთვის" ითარგმნა.
პირველი კონცერტი 12 თებერვალს გერმანიის დედაქალაქ ბერლინში (Pierre Boulez Saal) გაიმართება. 13 თებერვალს ანსამბლი "რუსთავი" დევიდ ბრუსის ნაწარმოების სტუდიურ ჩანაწერს გააკეთებს. 14 თებერვალს "რუსთავი" პოლონეთის დედაქალაქში, ვარშავის ფილარმონიაში (Filharmonia Narodowa w Warszawie, Warsaw) წარსდგება მაყურებლის წინაშე. 15 თებერვალს კი, ისევ გერმანიაში, ჰამბურგში (Elbphilharmonie Hamburg) გამართავს კონცერტს. აღნიშნული ტურნეს ორგანიზატორია ცნობილი მუსიკოსი ავი ავიტალი.