ოკუპირებული აფხაზეთის ე.წ. საგარეო საქმეთა მინისტრმა ინალ არძინბამ სირიელ ხალხს ინგლისურად მიმართა.

მან აფხაზი ხალხის სახელით მწუხარება და მხარდაჭერა გამოთქვა დამანგრეველ მიწისძვრასთან დაკავშირებით, რომელმაც სირიაში რამდენიმე ათასი ადამიანის სიცოცხლე შეიწირა.

„ღრმა მწუხარებით მივიღეთ ამბავი სირიაში მომხდარი დამანგრეველი მიწისძვრის შესახებ. ჩვენ ვნახეთ უამრავი მსხვერპლი და დაჭრილი. ჩვენ თვალს ვადევნებთ სიახლეებს და ვეძებთ გზებს ძმური ხალხის მხარდასაჭერად. ძვირფასო სირიელებო, დღეს ჩვენ ვხედავთ ორმაგი სტანდარტების ცნობილ პოლიტიკას კოლექტიური დასავლეთის მხრიდან. მათ არ სურთ სირიის დახმარება პოლიტიკური მიზეზების გამო. ასეთი დამანგრეველი სტიქია ყოველგვარი პოლიტიკის მიღმა უნდა იყოს. ამ ტრაგიკულ მომენტში დროა გავერთიანდეთ და ვიმოქმედოთ. ძვირფასო სირიელებო, ჩვენ პატივს ვცემთ და გვიყვარხართ. იყავით მტკიცე“, - განაცხადა არძინბამ.

მან ასევე დასძინა, რომ განიხილება აფხაზური დიასპორის დაზარალებული წარმომადგენლების სირიიდან აფხაზეთში გადასახლების შესაძლებლობა. “ჩვენ ასევე განვიხილავთ აფხაზური დიასპორის დაზარალებული წარმომადგენლების სირიიდან აფხაზეთში ჩასახლების შესაძლებლობას. აფხაზეთის ზოგიერთმა ოჯახმა გამოთქვა სურვილი ობოლი ბავშვები იშვილონ. ეს პროცესი, რა თქმა უნდა, მოითხოვს შესწავლას და მუშაობას შესაბამის საკანონმდებლო ბაზაზე“, - განაცხადა არძინბამ.

მანამდე ცნობილი გახდა, რომ ოკუპირებული აფხაზეთის „მინისტრთა კაბინეტი“ თურქეთისა და სირიის დასახმარებლად, 300 ათას დოლარს გამოყოფს.

აფხაზეთის „საგარეო საქმეთა სამინისტროს“ ცნობით, თურქეთში მომხდარი დამანგრეველი მიწისძვრისას აფხაზური დიასპორის ორი წარმომადგენელი დაიღუპა.