ზუგდიდის მაჟორიტარი დეპუტატის, ირაკლი ჩიქოვანის განცხადებით, ანაკლიის პორტის მშენებლობა სტრატეგიული პროექტია, რომლის ირგვლივაც ძალიან ბევრი სპეკულაცია იყო, მაგრამ ყველა ამ სპეკულაციას ბოლო მოეღება.
როგორც ირაკლი ჩიქოვანმა აღნიშნა, ანაკლიის პორტის პროექტით, ირაკლი ღარიბაშვილმა დაამტკიცა, რომ მას დანაპირების საქმით გამაგრება შეუძლია.
„საქართველოს ხელისუფლება, საქართველოს მთავრობა ამ მშენებლობას დაიწყებს წელს და ეს არის უმნიშვნელოვანესი პროექტი. ეს არის მეგა პროექტი, რომელიც ხელს შეუწყობს ჩვენი ქვეყნის ეკონომიკურ განვითარებას. ეს თავიდან ბოლომდე ჯდება იმ ეკონომიკურ ხედვაში, რომელიც მთავრობას გააჩნია და რა თქმა უნდა, ახალ სიცოცხლეს შესძენს სამეგრელოს რეგიონს და კონკრეტულად ზუგდიდს. კიდევ ერთხელ მინდა მივესალმო ამ გადაწყვეტილებას და ხაზი გაუსვა იმას, რომ ანაკლიის პორტი არის უმთავრესი და უმნიშვნელოვანესი სტრატეგიული პროექტი, რომლის ირგვლივაც ძალიან ბევრი სპეკულაცია იყო წლების განმავლობაში, მაგრამ ყველა ამ სპეკულაციას ბოლო ეღება იმ გადაწყვეტილებით, რომელიც მთავრობამ მიიღო. აქვე აღვნიშნავ, რომ ირაკლი ღარიბაშვილმა დაამტკიცა, რომ მას დანაპირების საქმით გამაგრება შეუძლია“, - განაცხადა ირაკლი ჩიქოვანმა.